नेपाली कम्युनिष्ट आन्दोनल सखाप पार्ने दिशामा केपी ओली लागेका छन्ः नेता पाण्डे

धादिङ ०५ भाद्र
नेपाली कम्युनिष्ट आन्दोलन नै सिध्याउने अभियानमा केपी ओली लागेको नेकपा एकीकृत समाजवादी पार्टीका नेता एवं धादिङका प्रदेश सांसद राजेन्द्र प्रसाद पाण्डेले बताएका छन् ।

शनिबार नेकपा एमालेबाट विभाजित हुँदै बनेको नेकपा एकीकृत समाजवादी पार्टीको भातृ संगठन युवा संघ धादिङको प्रथम विस्तारित बैठकलाई सम्बोधन गर्दै पाण्डेले सो कुरा बताएका हुन् । नेता पाण्डेले केपी शर्मा ओली राष्ट्र कै कलंक भएको बताउँदै ओलीले एकताका सबै ढोका बन्द गरेपछि माधव नेपालको नेतृत्वमा नेकपा एकीकृत समाजवादी पार्टी जन्मिएको प्रष्ट पारे ।

नेता पाण्डेले माओवादीसँग एकता हुँदै नेकपा नबनेको भए एमाले ५० सिटमा खुम्चने बताउँदै माओवादीसँगको एकतापश्चात मात्र प्रत्यक्षतर्फ ८० सिट र समानुपातिकसहित १२१ सिट जित्न सफल भएको जिकिर गरे ।

बैठकलाई सम्बोधन गर्दै अर्का नेता गुरु बुर्लाकोटीले हालको लोकतान्त्रिक गठबन्धन आगामी चुनावसम्म निरन्तर रहने जिकिर गरेका छन् । चुनाव चिह्न भन्दा पनि विचार महत्त्वपूर्ण हुने बताउँदै नेता बुर्लाकाटीले नेकपा एकीकृत समाजवादी पार्टीले विचार र योजना दिएर तमाम जनताहरुको मन जित्ने ठोकुवा समेत गरे ।

बैठकमा नेकपा एकीकृत समाजवादी समर्थित युवा संघमा आवद्ध सयौँ युवाहरुको सहभागिता रहेको थियो ।