माओवादी केन्द्र धुनिबेसी नगर सम्पर्क कार्यालय स्थापना

धादिङ २३ श्रावण
नेकपा(माओवादी केन्द्र) धुनिबेशी नगर सम्पर्क कार्यालय उद्धघाटन भएको छ । शनिबार माओवादी केन्द्र धादिङका इन्चार्ज तथा पार्टी केन्द्रीय सदस्य सालिकराम जम्कट्टेलले धुनिबेसी नगरपालिका वडा नं.–८, खानीखोलामा कार्यालयको उद्धघाटन गर्नुभएको हो ।

पार्टी कार्यालय उद्धघाटन गर्दै जिल्ला इन्चार्ज जम्कट्टेलले माओवादी पार्टी अब चलायमान हुँदै हरेक जनताको घर दैलोमा पुगेर जनतासँगै साक्षात्कार गर्दै अगाडि बढ्नुपर्ने बताउनु भयो । पुराना तिक्तताहरुलाई भुलेर नयाँ एकता कायम गर्दै जनताको मन जित्न सफल हुनुपर्ने बताउनु भयो ।

कार्यालय उद्धघाटन कार्यक्रममा नेता जम्कट्टेलको प्रमुख आतिथ्यता रहेको थियो भने अतिथिहरुमा माओवादी केन्द्र धादिङका अध्यक्ष विजय बुर्लाकोर्टी, जिल्ला नेताहरु मनराज भण्डारी(सैलेश), दिपक लामिछाने(सुवोध), दिपक विश्वकर्मा, राजन रेग्मी(निशान) लगायत माओवादी नेता कार्यकर्ताहरुको उल्लेख्य सहभागिता रहेको थियो ।

माओवादी केन्द्रको स्थायी कमिटी बैठकले श्रावण ३० गतेभित्र हरेक वडा कमिटी गठन गरिसक्ने समयसीमा तोकेकाले यतिबेला जिल्ला जिल्लामा अभियानात्मक रुपमा भेला बैठक तथा कमिटी निर्माण अभियान तिब्र बनाइएको छ ।