रुवीभ्यालीका स्वास्थ्य संयोजक राज बहादुर तामाङमाथि कुटपिट/कर्मचारी संगठनहरुद्धारा खेद प्रकट

धादिङ ३१ आषाढ
रुविभ्याली गाउँपालिका धादिङका स्वास्थ्य संयोजक राज बहादुर तामाङमाथि कार्यालयभित्रै कुटपिट भएको छ । रुविभ्याली ३ कै च्याङ्बा भनिने राकेश तामाङ र बोला तामाङले धादिङबेसीस्थित सम्पर्क कार्यालयमा रहेका स्वास्थ्य संयोजक तामाङलाई हातपात गरेको सोही पालिकाका कर्मचारीहरुद्धारा जारी विज्ञप्तीमा भनिएको छ ।

विज्ञप्तीमा मङ्गलबार बिहान ११ः३० को समयमा कुनै विवाद बिना नै पछाडिबाट आएर एक्कासी कुटपिट गरिएकाले कुटपिटमा सङ्लग्नलाई तुरुन्त पक्राउ गरी कानुन बमोजिम कारबाही गर्न अनुरोध गरिएको छ ।

यस्तै निजामती कर्मचारीहरुको आधिकारिक ट्रेड युनियन जिल्ला कार्यसमिति, धादिङले समते एक विज्ञप्ती जारी गर्दै घटनाप्रति खेद प्रकट गरेको छ । सचिव कृष्ण कुमार श्रेष्ठद्धारा जारी प्रेस विज्ञप्तीमा घटनाका आरोपीहरुलाई नियन्त्रणमा लिई कानुनी कारबाही गर्न तथा भविष्यमा यस्ता खाले घटना नदोहोरिने प्रतिबद्धता सहित कर्मचारीहरुलाई बिना डर, धम्की त्रास एवं भय रहित भई काम गर्ने वातावरण मिलाउन स्थानीय प्रशासनको ध्यानाकर्षग गराइएको छ । संगठनले आरोपीलाई कारबाहीको माग गर्दै प्रमुख जिल्ला अधिकारी ज्ञान प्रसाद ढकालसमक्ष ज्ञापनपत्र समेत बुझाएको छ ।