नगर प्रमुख ढुङ्गानाले गरे “लभ हो” चलचित्रको शुभ मुहुर्त

धादिङ जेष्ठ २६
सन्तोष काफ्लेको निमार्ण तथा सुवास जि.सी.को निर्देशनमा बन्न लागेको नेपाली कथानक चलचित्र “लभ हो” को आज धादिङबेसीमा एक कार्यक्रमका बीच शुभ मुहुर्त कार्यक्रम सम्पन्न गरिएको छ । नीलकण्ठ नगरपालिकाका मेयर भिम प्रसाद ढुङ्गानाले नरिवल फुटाएर चलचित्रको शुभ मुहुर्त गर्नु भएको हो । सामाजिक सन्देशलाई मुख्य विषयवस्तु बनाएको चलचित्र धादिङको नीलकण्ठ नगरपालिकाभित्रका ठाउँहरुमा छायाङ्कन गरिने छ । प्रदिप जि.सी, विश्व देवकोटा, रवि भट्टराई, प्रकाश ढकाल सहायक निर्माता रहनुभएको चलचित्रमा सन्तोष काफ्लेले कथा लेख्नु भएको छ ।

चलचित्रमा सितल के.सी., प्रेम भारती, विशाल लिम्बु, दिप्ती तामाङ, सुवास अर्याल दर्शने, धर्मेन्द्र श्रेष्ठ, प्रतिभा ढकाल, जुनु जि.सी लगायतका कलाकारहरुको अभिनय रहने छ । यस्तै विश्व देवकोटाको गीत र वसन्त सापकोटाको सङ्गीत रहने चलचित्रमा मेलिना राई, वसन्त सापकोटा, राज सिग्देल लगायतका चर्चित कलाकारहरुले स्वर दिएका छन् । शुभ मुहुर्त कार्यक्रममा बोल्दै ढुङ्गानाले सामाजिक कथालाई आधार बनाई बन्न लागेको चलचित्र सफलताको शुभकामना दिनुका साथै नगरपालिकाले आवश्यक साथ र सहयोग प्रदान गर्ने प्रतिवद्धता व्यक्त गर्नु भयो । ईन्जोए मुभिज् प्रा.लि. र यूनिक मिडिया नेटवोर्कको सम्युक्त प्रश्तुती रहने चलचित्रमा समाजमा भएको हत्या, हिंसा, बलत्कारको घटनालाई यथार्थ रुपमा देखाउने उदेश्यले निर्माण गर्न लागिएको निर्देशक जि.सी ले बताउनु भएको छ ।