नीलकण्ठ नगर शिक्षा शाखाद्धारा सुनगाभा एकेडेमीका ३ शिक्षक सम्मानित

धादिङ ०९ आषाढ
सुनगाभा एकेडेमी धादिङबेसीका ३ जना शिक्षकहरु सम्मानित भएका छन् । नीलकण्ठ नगरपालिकाले शैक्षिक सत्र २०७७ सालमा सञ्चालन गरेको कक्षा ८ को वार्षिक परीक्षामा विज्ञान, अङ्ग्रेजी र गणित विषयमा नगरपालिकाभित्रकै उत्कृष्ठ अध्यापन गरेको भन्दै नगरपालिकाको शिक्षा शाखाले सम्मान गरेको हो ।
नगरपालिकाले सञ्चालन गरेको कक्षा ८ को परीक्षामा सुनगाभा एकेडेमीका विद्यार्थीहरुले विज्ञान विषयमा ६४ प्रतिशत, अङ्ग्रेजी विषयमा ६९ प्रतिशत र गणित विषयमा ९५ प्रतिशतका साथ नगरभित्रकै उत्कृष्ठ नतिजा ल्याएका थिए ।

सम्मानित हुने शिक्षकहरुमा विज्ञान विषय शिक्षक गोकण अधिकारी, गणित विषय शिक्षक दिपक खड्का र अङ्ग्रेजी विषय शिक्षक कपिल जम्कट्टेल रहनुभएको छ ।

स्थापनाकालदेखि नै गुणस्तरीय शिक्षका लागि निरन्तर लागिरहेको बताउदै विद्यालयका प्रधानाध्यापक वद्रि लम्सालले यो सफलताले आगामी शैक्षिक सत्रका लागि झन उर्जा प्राप्त भएको बताउनु भयो ।