वाईसीएल धादिङले आयोजना गरेको रक्तदान कार्यक्रममा ७९ जनाले गरे रक्तदान

धादिङ,३१ जेठ ।
विश्व रक्तदात दिवसको अवसरमा योङ्ग कम्युनिष्ट लिग(वाइसीएल) धादिङले आयोजना गरेको रक्तदान कार्यक्रममा ७९ जनाले रक्तदान गरेका छन् । सोमबार धादिङबेसी स्थित नेपाल रेडक्रस सोसाईटी जिल्ला शाखाको प्राङ्गणमा सम्पन्न भएको रक्तदान कार्यक्रममा ७ जना महिला र ७२ जना पुरुष गरी ७९ जनाले रक्तदान गरेको वाइसिएल धादिङका संयोजक राजाराम रिजालले जानकारी दिनुभयो ।

ने.क.पा. (माओवादी केन्द्र) धादिङका अध्यक्ष विजय बुर्लाकोटी, नेता तथा नीलकण्ठ नगरपालिकाका उप प्रमुख मनराज भण्डारी, वाइसिएल धादिङका इन्चार्ज चन्द्र बहादुर सिलवाल नेतृ अर्पणा सिंखडालाई नेता राम बहादुर भण्डारी र जिल्ला संयोजक राजाराम रिजालले संयुक्त रुपमा रगत संकलन गर्ने व्याग हस्तान्तरण गरेर कार्यक्रमको उद्घाटन गर्नुभएको थियो ।

वाइसिएल धादिङको आयोजना तथा नेपाल रेडक्रस सोसाइटी रक्त सञ्चार सेवा केन्द्र, धादिङको प्राबिधिक सहयोगमा स्वास्थ्य सुरक्षाका सम्पूर्ण मापदण्डहरुलाई पालना गर्दै कार्यक्रमको आयोजना गरिएको संयोजक रिजालको भनाइ छ ।