१० औँ धादिङ जिल्ला स्तरीय राष्ट्रपति रनिङ सिल्ड प्रतियोगिता विशालटारमा सुरु

धादिङ ०९ वैशाद
स्वास्थ्यका लागि खेलकुद राष्ट्रका लागि खेलकुद भन्ने नारा सहित धादिङको वेनिघाट रोराङ गाउँपालिकास्थित चन्द्रोदय माध्यमिक विद्यालयमा १० औँ धादिङ जिल्ला स्तरीय राष्ट्रपति रनिङ शिल्ड प्रतियोगिता सुरु भएको छ । जिल्ला समन्वय समिति धादिङका प्रमुख जगन्नाथ नेपाल र बेनिघाट रोराङ गाउँपालिका अध्यक्ष हरि डल्लाकोटीले बल र सिट्टी हस्तान्तरण गरी प्रतियोगिताको सुभारम्भ गर्नुभएको हो ।

न्द्रोदय माध्यमिक विद्यालय विशालटारको व्यवस्थापनमा सुरु भएको प्रतियोगितामा छात्र तथा छात्रातर्फ एथ्लेटिक्स, भलिबल, कबड्डी, तेक्वान्दो र कराते लगायतका ९६ पदकका लागि प्रतिस्पर्धा हुने जिल्ला खेलकुद विकास समिति धादिङका अध्यक्ष प्रताप तामाङले जानकारी दिनुभयो । जिल्ला खेलकुद विकास समिति धादिङको आयोजनामा सुरु भएको प्रतियोगितामा नियमित अध्ययन गर्ने कक्षा १२ सम्मका १८ वर्ष मुनिका विद्यार्थीहरु सहभागी भएका छन् । प्रतियोगिताको बिजेताले प्रदेश स्तरीय प्रतियोगितामा सहभागिता जनाउन पाउने छन् भने प्रदेशमा विजयी खेलाडीले राष्ट्रिय स्तरको प्रतियोगितमा सहभागिता जनाउन पाउने छन् ।

जिल्ला स्तरीय प्रतियोगिताको लागि जिल्लाका ५ वटा स्थानीय तहबाट छनौट भएर आएका खेलाडीहरुको सहभागिता रहेको छ । १३ वटै पालिकाका खेलाडीहरु समावेश गर्ने लक्ष्य रहेता पनि स्थानीय तहहरुले पालिका स्तरीय राष्ट्रपति रनिङ शिल्ड प्रतियोगिताको आयोजना नगरेकाले समावेश गराउन नसकिएको अध्यक्ष तामाङले बताउनु भयो । प्रतियोगिताको समापन भोलि हुनेछ ।