विश्व शान्ति तथा एकिकृत परिवार महासंघ धादिङद्धारा आमाको माया छात्रावासलाई सहयोग 

धादिङ,०२ बैशाख ।
नयाँ वर्षको अवसर पारि विश्व शान्ति तथा एकिकृत परिवार महासंघ ( FFWPU ) धादिङले आमाको माया छात्रावासमा सहयोग गरेको छ । धादिङको नीलकण्ठ नगरपालिका वडा नम्बर ४ स्थित आमाको माया छात्रावासका २५ जना अनाथ बालकालिकाहरुलाई लत्ताकपडा, चामल, स्टेशनरी सहयोग गरेको विश्व शान्ति तथा एकिकृत परिवार महासंघ धादिङका प्रमुख दिपक सापकोटाले जानकारी दिनुभयो । उक्त सहयोग कार्यक्रममा धादिङबेशीमा व्यवसाय गर्दै आउनुभएका ढोलाली कपडा पसलका प्रोपाईटर, दाजुभाई फर्निसिङको प्रोपाईटर र सापकोटा किराना पसल बाट पनि थप सहयोग प्रदान गरिएको थियो । नयाँ वर्षको अवसरमा सहयोग पाउदा छात्रावासका अनाथ बालबालिकाहरुले खुशी व्यक्त गरेको सापकोटाले बताउनु भयो ।
विश्व शान्ति तथा एकिकृत परिवार महासंघ धादिङले २०१५ देखि परिवार, समाज र राष्ट्रलाई शान्तिपुर्ण बनाउने र एकिकृत गराउने उद्धेश्यले नैतिक पुर्नजागरणको लागि विभिन्न सचेतनामुलक तालि तथा कार्यक्रमहरु संचालन गर्दै आएको छ । आमाको माया छात्रावासका संस्थापक डा.नविन बन्दु पहाडीले सहयोगीदाताहरु र संस्थाका प्रतिनिधीहरुलाई न्यानो स्वागत गर्नुका साथै कृतज्ञता व्यक्त गर्नुभएको थियो ।