धादिङको पात्लेमा समन्वय कप फुटबल प्रतियोगिता सुरु

धादिङ फाल्गुण २१
नीलकण्ठ नगरपालिका वडा नं. १ पात्लेमा धादिङ जिल्ला स्तरीय समन्वय कप फुटबल प्रतियोगिता सुरु भएको छ । जिल्ला समन्वय समिति धादिङको आयोजना तथा बुद्धभूमी युवा समाजको व्यवस्थापनमा शुक्रबारबाट सुरु भएको प्रतियोगिताका राष्ट्रिय खेलकुद परिषदका सदस्य सचिव रमेश सिलवालले उद्घाटन गर्नुभएको हो । स्वास्थ्यको लागि खेलकुद राष्ट्रको लागि खेलकुद भन्ने मूल नाराका साथ सुरु भएको प्रतियोगितामा धादिङ जिल्लाका १३ वटै स्थानीय तह स्तरका खेलाडीहरुको सहभागिता रहेको छ । जिल्ला समन्वय समितिका प्रमुख जगन्नाथ नेपालको अध्यक्षतामा सम्पन्न भएको उद्घाटन कार्यक्रममा राष्ट्रिय खेलकुद परिषदका सदस्य सचिव रमेश सिलवालको प्रमुख आतिथ्यता रहेको थियो । त्यस्तै कार्यक्रममा उपप्रमुख विन्दा बरामु नेपाली, जिल्ला खेलकुद विकास समिति धादिङका अध्यक्ष प्रताप सि तामाङ लगाएतको सहभागिता रहेको थियो ।