नेत्रावती डबजोङ गाउँपालिकाको सेमजोङमा नागरिक आरोग्य सेवा केन्द्र स्थापना

धादिङ १२ माघ
नेत्रावती डबजोङ गाउँपालिका वडा नं. २ ताङ्जामाने सेमजोङमा नागरिक आरोग्य सेवा केन्द्र स्थापना भएको छ । नागरिकहरुलाई प्राकृतिक र आर्युवेदिक चिकित्सा पद्धतिद्धारा उपचार गराउने उद्देश्यले उक्त आरोग्य केन्द्रको स्थापना गरिएको हो । प्रदेश सरकार सामाजिक विकास मन्त्रालय स्वास्थ निर्देशनालय जिल्ला आर्युवेद स्वास्थ्य केन्द्र धादिङ अन्तरगत रहने गरी नागरिक आरोग्य सेवा केन्द्र स्थापना गरिएको हो । आइतबार एक कार्यक्रमका बिच नेत्रावती डबजोङ गाउँपालिका अध्यक्ष दुर्गा कुमार शाक्यले उक्त आरोग्य केन्द्रको उद्घाटन गर्नुभएको हो ।

कार्यक्रमलाई संबोधन गर्दै अध्यक्ष शाक्यले आफू नियमित रुपमा आर्युवेदिक औषधीहरु सेवन गर्ने गरेको बताउदै हाम्रो गाउँ वस्ती र वन जङ्गलमा भएका जडिबुटीहरुको सही पहिचान गर्दै आर्युवेदिक औषधीको रुपमा प्रयोग गर्नुपर्ने बताउनु भयो । यस्तै अध्यक्ष शाक्यले बढ्दो आधुनिकताले गर्दा र खानपानमा सावधानी नअपनाउदा विभिन्न किसिमका रोगहरु देखा परेकाले प्राकृतिक चिकित्सा पद्धतिलाई अनाउन आग्रह गर्दै गाउँपालिकाले १ घर १ धाराको अवधारणा लिएकाले आफ्नो करेसाबारीमा अर्गानिक र विषादी रहित तरकारी उत्पादन गरी प्रयोग गर्न समेत गाउँपालिकाबासीलाई सुझाव दिनुभयो ।

यस्तै गाउँपालिकाका प्रमुख प्रशासकीय अधिकृत श्यामकृष्ण पौडेलले नागरिक आरोग्य सेवा केन्द्रलाई आवश्यक पर्ने औषधि र जनशक्तिको व्यवस्थापनमा गाउँपालिकाले सहयोग गर्न तत्पर रहेको बताउदै वडा नम्बर २ का नागरिक मात्र नभै सबै गाउँपालिकाका सेवाग्राहीले सेवा प्रयोग गर्न आग्रह गर्नुभयो ।

त्यसैगरी गाउँपालिकाका स्वास्थ्य संयोजक कृष्ण बहादुर पौडेलले एलोपेथिक र आयुर्वेदिक दुबै खाले उपचार पद्धति को सुरुवात गाउँपालिकामा भएको बताउँदै एलोपेठी उपचार पद्धतिले मात्र सबै रोगहरुको निदान नहुने हुँदा आर्युबेदिक उपचार पद्धतिको सुरुवात गरेको बताउनु भयो ।

नागरिक आरोग्य सेवा केन्द्र उद्धघाटन कार्यक्रममा जिल्ला आर्युवेद स्वास्थ्य केन्द्र धादिङका निमित्त कार्यालय प्रमुख गोकुल पराजुलीको अध्यक्षता, नेत्रावती डबजोङ गाउँपालिका अध्यक्ष दुर्गा कुमार शाक्यको प्रमुख आतिथ्यता, गाउँपालिकाका प्रमुख प्रशासकीय अधिकृत श्यामकृष्ण पौडेलको विशेष आतिथ्यता वडा नं. १ का अध्यक्ष चन्द्र बहादुर पल्ली मगर, वडा नं. २ का अध्यक्ष सुन्दर थापा, वडा नं. ४ का अध्यक्ष तिल बहादुर गुरुङ, गाउँपालिकाका स्वास्थ्य संयोजक कृष्ण बहादुर पौडेल, रेडियो बिहानीका स्टेशन म्यानेजर सञ्जय देवकोटा लगायतको आतिथ्यता रहेको थियो ।

धादिङका ४ वटा स्थानीय तहमा नागरिक आरोग्य सेवा केन्द्र सञ्चालन गरिरहेको जिल्ला आर्युवेद स्वास्थ्य केन्द्र धादिङले स्थानीय तह गठन भैसकेपछि पहिलो नेत्रावती डबजोङ गाउँपालिकामा सञ्चालन गरेको हो । आरोग्य सेवा केन्द्रमा कुनै पनि शुल्क नलिई नागरिकहरुलाई आर्युवेदिक औषधी उपलब्ध गराउने र उपचार समेत गराउने योजना रहेको जिल्ला आर्युवेद स्वास्थ्य केन्द्र धादिङका प्रकाश सापकोटाले बताउनु भयो । आरोग्य सेवा केन्द्रबाट नेपाल सरकारले तोकेका २३ प्रकारका औषधीहरु जस्तै ग्यास्ट्रिक, बाथ, गानो गोला, प्रेसर, पिनास लगायतका औषधीहरु उपलब्ध हुनेछन् । निकट भविष्यमै योगा कक्षा समेत सञ्चालन गरिने योजना रहेको छ ।