धादिङबेसीमा भएको प्रथम मैत्रीपूर्ण महिला फुटबल प्रतियोगिता क्षेत्र नं. २ ले जित्यो

धादिङ १८ पौष
शनिबार धादिङबेसीमा प्रथम मैत्रीपूर्ण महिला फुटबल ट्रफि प्रतियोगिता सम्पन्न भएको छ । जिल्ला खेलकुद विकास समिति धादिङको आयोजना तथा ब्वाईज युनाईटेड क्लब एकेडेमी धादिङको सह–आयोजनामा सम्पन्न भएको मैत्रिपूर्ण महिला फुटबल खेल धादिङबेसी स्थित खुल्ला मञ्च टुडिँखेलमा भएको थियो । खेलमा धादिङ निर्वाचन क्षेत्र नं. २ धादिङबेसी सिरानबजारको ब्वाईज युनाईटेड फुटबल एकेडेमीका महिला खेलाडीहरुको टिमले २ का बिरुद्ध ५ गोल गर्दै जित हात पारेको छ भने क्षेत्र नं. १ गजुरीका महिला खेलाडीको टिम २ गोल गर्दै उपविजेता बनेको छ । स्वास्थ्यका लागि खेलकुद राष्ट्रका लागी खेलकुद भन्ने नाराका साथ सम्पन्न भएको मैत्रीपूर्ण फुटबल खेल कार्यक्रमको अध्यक्षता जिल्ला खेलकुद विकास समिति धादिङका अध्यक्ष प्रताप तामाङले गर्नुभएको थियो भने प्रमुख आतिथ्यता नीलकण्ठ नगरपालिकाका उपमेयर मनराज भण्डारीले गर्नुभएको थियो । कार्यक्रमलाई संबोधन गर्दै उपमेयर भण्डारीले कोभिडका कारण रोकिएका खेलकुदका गतिविधिहरु विस्तारै सुरु हुन थालेको बताउदै महिलाहरुको खेलकुदलाई प्रर्बद्धन गर्ने उद्देश्यले जिल्ला खेलकुद विकास समितिले कार्यक्रम आयोजना गरेकोमा धन्यवाद व्यक्त गर्नुभयो ।