धादिङ बोर्डिङमा अभिभावक शिक्षा कार्यक्रम सम्पन्न

धादिङ जेष्ठ १३
धादिङ आवासीय माध्यमिक विद्यालयले सोमबार अभिभावकहरुका लागि अभिभावक शिक्षा कार्यक्रमको आयोजना गरेको छ । आफ्ना बालबच्चालाई कसरी पढाईप्रति ध्यान केन्द्रित गराउने? बालबालिकालाई असल व्यवहार तथा नैतिक शिक्षा प्रदान गर्न अभिभावक विद्यार्थी र शिक्षकको कस्तो भुमिका रहन्छ ? शिक्षालाई आधुनिक र व्यवहारिक रुपमा कसरी परिमार्जित गर्ने तथा विद्यार्थीहरुको शैक्षिक सुधारका निमित्त अभिभावक, शिक्षक र विद्यार्थीहरुको भूमिका के हुने? भन्ने विषयमा राष्ट्रिय तथा अन्तराष्ट्रिय रुपमा ख्यातिप्राप्त प्रशिक्षक किशोर श्रेष्ठले अभिभावकरुका साथै विद्यार्थीहरुलाई समेत प्रशिक्षण दिनुभएको थियो ।

कक्षा नर्सरीदेखि कक्षा १० सम्मका अभिभावकहरुका लागि र कक्षा ४ देखि १० सम्मका विद्यार्थीहरुका लागि २ चरणमा आयोजना गरिएको प्रशिक्षण कार्यक्रममा शिक्षा विकास तथा समन्वय इकाई धादिङका प्रमुख अम्बिका प्रसाद आचार्य, शाखा अधिकृत कृष्ण कुमार श्रेष्ठ, गणेश हिमाल क्याम्पसका निर्देशक एवं विद्यालय सञ्चालक समिति सदस्य भुपेन्द्र कुमार श्रेष्ठ, गणेश हिमाल क्याम्पस सञ्चालक समितिका अध्यक्ष एवं विद्यालय सञ्चालक समिति सदस्य गोविन्द कुमार श्रेष्ठ, न्यु धादिङ बोर्डिङ स्कुलका अध्यक्ष एवं विद्यालय सञ्चालक समिति सदस्य कृष्ण प्रसाद दाहाल, प्रधानाध्यापक हरि लम्साल, विद्यालयका एजुकेटिभ डाइरेक्टर सुरेन्द्र प्रसाद शाह लगायतको आतिथ्यता रहेको थियो । प्रशिक्षक श्रेष्ठले विद्यार्थीहरुलाई कसरी खुसी हुने, निरोगी हुने, सन्तुष्ट हुने र उच्च ज्ञान सीपको सोचाइ विकास गर्ने भन्ने कुराको बारेमा प्रशिक्षित पार्नुभएको थियो ।

यस्तै विद्यार्थीहरुलाई सुरुमा बेसिक कुराहरुको जानकारी लिने, कक्षामा नियमित उपस्थित हुने, नबुझेको कुराहरु अप्ठ्यारो नमानी शिक्षकलाई सोध्ने जस्ता विषयहरुमा पनि सचेत गराउनु भएको थियो । बालबालिकाहरुलाई हप्काएर, गाली गरेर, पिटेर होइन माया गरेर उनीहरुको गल्ती कमजोरीलाई सुधार गर्दै पढाइप्रति आकर्षण गर्न सकिने कुरा समेत अभिभाकहरुलाई बताउनु भएको थियो । शैक्षिक सुधारका लागि सही समय तालिका, आवश्यक मात्रामा निद्रा, तनाबमुक्त वातावरण, सही खानपिनको व्यवस्थापन, आत्म सम्मान, योगा तथा शारीरिक व्यायामहरु आवश्यक पर्ने हुदाँ विद्यार्थी मात्र लागि परेर हुदैन विद्यालयको शैक्षिक वातावरण अभिभावकहरुको शैक्षिक अवस्था, घरायसी वातावरण जस्ता कुराहरुले निर्धारण गर्ने समेत श्रेष्ठले बताउनु भयो ।

कार्यक्रममा विद्यालय सञ्चालन गरेका विभिन्न कार्यक्रमहरुको बारेमा जानकारी दिदै प्रधानाध्यापक हरि लम्सालले प्रवेशिका परीक्षामा नेपालभरिका संस्थागत विद्यालयतर्फ सातौँ स्थानमा पर्न सफल धादिङ आवासीय माध्यमिक विद्यालयले हरेक वर्षको एसईई परीक्षामा जिल्लाकै नम्बर एक बन्न सफल भएको बताउदै पढाइका अतिरिक्त पौडी, योगा, भाषा कक्षा, नृत्य कक्षा, प्राविधिक सिपसँग सम्बन्धित कक्षाहरु, व्यवहारिक तथा कृषि सिपसँग सम्बन्धित कक्षाहरु आगामी शैक्षिक सत्रहरुमा सञ्चालन गरी सबै हिसाबले जिल्लाको मात्र नभइ राष्ट्रकै नमुना विद्यालय उन्मुख रहेको बताएका थिए ।