धादिङबेसी खानेपानी तथा सरसफाई मुल उपभोक्ता समितिको तदर्थ समिति गठन भङग गर्न सर्वोच्चको आदेश

धादिङ १४ मङ्सिर

सर्वोच्च अदालतले अबैधानिक रुपमा नीलकण्ठ नगरपालिका धादिङले गठन गरेको धादिङबेसी खानेपानी तथा सरसफाई मुल उपभोक्ता समितिको तदर्थ समिति गठन भङग गर्न आदेश दिएको छ । धादिङबेसी खानेपानी तथा सरसफाई मुल उपभोक्ता समितिको तदर्थ समिति गठनमा नीलकण्ठ नगरपालिकाले मनोमानी रुपमा उपभोक्तालाई समेत जानकारी नदिई समिति गठन गरेको भन्दै मंसिर १० गते सर्वोच्च अदालतमा रिट परेको थियो । सोही रिटलाई सर्वोच्च अदालतका प्रधान न्यायाधीश चोलेन्द्र शम्शेर जबराको एकल इजलासले उक्त तदर्थ समिति भङग गर्न आइतबार अन्तरिम आदेश दिएको हो । नीलकण्ठ नगरपालिका धादिङले कात्र्तिक १८ गते धादिङबेसी खानेपानी तथा सरसफाई मुल उपभोक्ता समितिको तदर्थ समिति गठन गरेको थियो । धादिङबेसी खानेपानी तथा सरसफाई मुल उपभोक्ता समितिले गरेको रिटमाथि प्रारम्भिक सुनुवाइ गर्दैै प्रधान न्यायाधीशको इजलासले उक्त तदर्थ समिति रोक्न आदेश दिएको सर्वोच्च अदालतले जनाएको छ । न्यायाधीश जबराको इजलासले आदेश पास भएको मितिले १५ दिनभित्र विपक्षी नम्बर १ का हकमा महान्यायाधिसवक्ताको कार्यालय मार्फत अन्य तथा विपक्षीहरुको हकमा आफैंले वा आफ्नो प्रतिनिधि मार्फत लिखित जवाफ पेश गर्न भनेको छ ।