रेडक्रस धादिङदारा प्राकृतिक विपत्तिमा परेकाहरुलाई नगद सहित गैह्र खाद्य सामग्री सहयोग

धादिङ ०६ मङ्सिर
मानवीय सेवामा सदैव अगाडि रहेको नेपाल रेडक्रस सोसाइटी धादिङ जिल्ला शाखाले जिल्लाका विभिन्न स्थानीय तहमा प्राकृतिक विपत्तिमा परेकाहरुलाई नगद सहित गैह्र खाद्य सामग्री हस्तान्तरण कार्यक्रमलाई तिब्रता दिएको छ । यसै क्रममा जिल्लाको सिद्धलेक गाउँपालिका, त्रिपुरासुन्दरी गाउँपालिका र बेनिघाट रोराङ गाउँपालिकाका विभिन्न वडाहरुमा सहयोग हस्तान्तरण गरिएको धादिङ शाखाका सभापति नारायण तिमल्सिनाले जानकारी दिनुभयो । यही कार्तिक २७ र २८ गते सिद्धलेक गाउँपालिकाको वडा नं. ३ र ७ का ९ घर परिवार, मङ्सिर ३ गते त्रिपुरासुन्दरी गाउँपालिकाका २ परिवार, मङ्सिर ४ र ५ गते बेनिघाट रोराङ गाउँपालिका वडा नं. ३, ५, ७ र १० का १८ परिवारका साथै गल्छी गाउँपालिकाका ६ परिवारलाई प्रति परिवार नगद रु. ५ हजारका साथै व्यक्तिगत सरसफाइका सामग्री र १ वटा झुल समेत वितरण गरिएको संस्थाका सभापति तिमल्सिनाले बताउनु भयो ।