धादिङमा दशै तिहारको समयमा ४३ जना जुवाडे पक्राउ, नगद ४ लाख ३१ हजार बरामद

धादिङ ०२ मङ्सिर
धादिङमा दशै तिहारको समयमा प्रहरीले ४३ जना जुवा तास खेल्ने मानिसहरुलाई नियन्त्रणमा लिएको छ भने ४ लाख ३१ हजार ७ सय १० रकम बरामद गरेको छ । मङ्सिर २ गते राति धुनिबेसी नगरपालिका वडा नं. ८ खानीखोलामा कृष्ण बानियाको घरमा कौडा खेलिरहेको भन्ने विशेष सूचनाका आधारमा इलाका प्रहरी कार्यालय खानीखोलाबाट खटिएको टोलीले नगद रु. १ लाख ७९ हजार ६ सय ७५ सहित २१ जना मानिसहरु लाई नियन्त्रणमा लिएको हो । यस्तै कार्तिक १३ गते धुनिबेसी नगरपालिका वडा नं. ९ बाट पनि प्रहरीले नगद रु. ५२ हजार ५ सय ५ सहित ६ जनालाई पक्राउ गरेको हो । यसैगरी कार्तिक १४ गते धुनिबेसी नगरपालिका ७ नौबिसेबाट नगद रु. ९७ हजार ६ सय ६५ सहित ८ जनालाई पक्राउ गरेको हो भने कार्तिक २७ गते गजुरी गाउँपालिका वडा नं. १ बाट रु १ लाख १ हजार ८ सय ६५ नगद सहित ८ जनालाई पक्राउ गरेको जिल्ला प्रहरी कार्यालय धादिङले जानकारी दिएको छ । पक्राउ परेकाहरुलाई मुलुकी फौजदारी संहिता २०७४ बमोजिम कारवाही गरिएको समेत प्रहरीले जानकारी दिएको छ ।