पृथ्वी राजमार्ग क्षेत्रका होटल तथा खाद्यान्न पसलहरुमा प्रशासनको अनुगमन

धादिङ २५ कार्तिक
नजिकिदै गरेको तिहार लगायतका चाडपर्वलाई मध्ये नजर गर्दै जिल्ला प्रशासन कार्यालय धादिङले मङ्गलबार पृथ्वीराजमार्ग क्षेत्रका खाद्यान्न, होटल तथा रेष्टुरेन्टहरुको अनुगमन गरेको छ । होटल व्यवसायीहरुले यात्रुहरुसँग खाना खाजाको चर्को मूल्य लिने गरेको गुनासो आउन थालेपछि सहायक प्रमुख जिल्ला अधिकारी रुद्र बहादुर मल्लको नेतृत्वको टोलीले बेनिघाट रोराङ गाउँपालिका वडा नम्बर ९ स्थित हुग्दी खोलादेखि चरौदी बजार क्षेत्रमा सञ्चालित अधिकांश खाद्यान्न, होटल तथा रेष्टुरेन्टहरुको अनुगमन गरेको हो । अनुगमनको क्रममा बजार क्षेत्रमा सञ्चालित अधिकाशं होटलहरुमा खरिद बिल मूल्यसुची नभएको, र रक्सी लगायतका समानहरुको म्याद नाघिसकेकोे पाइएको छ । मङ्गलबार पृथ्वी राजमार्ग क्षेत्रमा सञ्चालित करिब २५ वटा होटल तथा रेष्टुरेन्टहरुको अनुगमन गर्दा बेनिघाट रोराङ गाउँपालिका वडा नम्बर ९ स्थित चरौदीमा सञ्चालित रमेश होटल लगायत ३ वटा होटल कारबाहिमा परेका छन् । उक्त होटलको इजाजत पत्र नभएको र बिना दर्ताको पसलमा मदिरा बिक्री वितरण गरेकाले रु ५/५ हजार रुपैंया जरिवाना सहित कारबाही गरिएको हो । यस्तै पृथ्वीराजमार्ग क्षेत्रमा सञ्चालित होटलहरुमा मूल्य सूची नराखेको, साइनबोर्ड, नापतौलको प्रमाण, स्थायी लेखा नम्बर, दर्ता, खरिद बिलहरु नभएको पाइएको छ । अनुगमनको क्रममा म्याद नाघेका सामानहरु जिल्ला प्रशासन कार्यालय धादिङले जफत गरी नष्ट गरेको छ ।