जिल्ला प्रहरी कार्यालय धादिङले जातीय छुवाछुत तथा कुटपिट मुद्धाको जाहेरी २१ दिनपछि लियो

धादिङ २४ कार्तिक
जातीय छुवाछुत तथा कुटपिट मुद्धाको जाहेरी लिन इन्कार गरेको जिल्ला प्रहरी कार्यालय धादिङले आइतबार जाहेरी लिएको छ । गत कार्तिक २ गते धादिङको नीलकण्ठ नगरपालिका वडा नम्बर १० ज्यामरुङ घर भएका २४ वर्षीय कञ्चन बसेलले आफूमाथि जातीय विभेद र कुटपिट भएको भन्दै जिल्ला प्रहरी कार्यालयमा जाहेरी दिएका थिए । तर, प्रहरी प्रमुख एसपी महेन्द्र खड्काले पीडितको जाहेरी लिनुको सट्टा मेलमिलाप गर्न दबाव दिएको पीडित पक्षले बताएको थियो । चौतर्फी बिरोध भएपछि आइतबार प्रहरीले जाहेरी लिएको छ । साथै आरोपी डम्बर बहादुर न्यौपानेलाई पक्राउ पनि गरेको छ ।

स्थानिय ५८ वर्षिय डम्बर बहादुर न्यौपानेले बसेलमाथि जातिय विभेद तथा छुवाछुत गरेको र कुटपीट समेत गरेको पीडितले बताएका छन् । गत कार्तिक २ गते आमा घरमा नभएको थाहा पाएपछि बसेल आमा खोज्न हिँडेका थिए । स्थानिय डम्बर न्यौपानेले सञ्चालन गरेको भट्टीमा मदिरा पिउँदै गरेको अवस्थामा आमालाई भेटेपछि उनले आमालाई सम्झाएका थिए । ‘तँ किन मेरो घरमा आइस् ? चमारे सार्की, गाइको मासु खाने भतुवा सार्की भएर बाहुनको घरमा आउने ? सार्कीलाई त हातले पनि पिट्नु हुन्न भन्दै चप्पल फूकालेर मुखमा थुकी पिटेको हो,’ पीडित बसेलले दिएको जाहेरीमा भनिएको छ ।

न्यौपानेले उनको आमालाई मदिरामा लठ्याएर नाजायज फाइदा समेत लिएको जाहेरीमा उल्लेख छ । प्रहरीले जाहेरी लिन अस्विकार गरेपछि उनले राष्ट्रिय दलित आयोगमा समेत उजुरी दिएका छन् । घटना भएको भोलीपल्टै पीडितले जिल्ला प्रहरी कार्यालयमा जाहेरी दिएपनि प्रहरीले २१ दिनपछि जाहेरी दर्ता गरी कारबाहीको प्रकृया अगाडि बढाएको दलित अभियन्ता नवराज मजाकोटीले जानकारी दिनुभयो ।