श्रावण ३० गते परीक्षणका लागि पठाइएको धादिङका ९५ जनाको कोरोना पिसिआर रिपोर्ट नेगेटिभ

धादिङ ०२ भाद्र
गत श्रावण ३० गते नीलकण्ठ नगरपालिकाको अग्रसरतामा स्वाव सङ्कलन गरी पिसिआर परीक्षणका लागि पठाइएको ९५ जनाको कोरोना रिपोर्ट नेगेटिभ आएको छ । नीलकण्ठ नगरपालिकाको आयोजनामा जिल्लाका विभिन्न स्थानका ९५ जनाको स्वाब सङ्कलन गरी पिसिआर परीक्षणको लागि राष्ट्रिय जनस्वास्थ्य प्रयोगशाला टेकु, काठमाडौँ पठाइएको थियो । स्वाव सङ्कलनका लागि पठाइएका सबैको रिपोर्ट नेगेटिभ आएको नीलकण्ठ नगरपालिका धादिङका स्वास्थ्य संयोजक विष्णु रिजालले बताउनु भयो । पिसिआर रिपोर्ट नेगेटिभ आएका ९५ जना नगरपालिका तथा पालिकाले निर्माण गरेको क्वारेन्टाइन तथा आइशोलेसनमा बसेकाहरु रहेका संयोजक रिजालले बताउनु भयो । रिजालका अनुसार पिसिआर रिपोर्ट नेगेटिभ आएका ९५ जनालाई घर पठाउने तयारी भैरहेको छ । यो समाचार तयार पार्दासम्म नीलकण्ठ नगरपालिकामा कोरोना संक्रमितको संख्या ७३ पुगेको छ भने जिल्लाभर सङ्क्रमितको सङ्ख्या १ सय ६३ रहेको छ ।