जस्तापाता लिएर बाढी प्रभाबित क्षेत्रमा गजुरी १ का अध्यक्ष पण्डित

भुवन भण्डारी
गजुरी धादिङ
धादिङको दक्षिणी भेग अन्तर्गत पर्ने गजुरी गाउँपालिका वडा नं.१ का वडा अध्यक्ष राजकुमार पण्डित अविरल वर्षाका कारण वडाका जनतामा परेको समस्या समाधान गर्न घरदैलोमा पुग्नु भएको छ । साउन ४ र ५ गतेको वर्षा र बिहीबारको वर्षाले लगभग १० घर पुर्ण रूपमा क्षति भए पश्चात् वडा अध्यक्ष पण्डित आदामारा, उज्यालो गाउँ र हागेटारमा जस्तापाता र त्रिपाल लिएर जनताको घर दैलोमा पुग्नुभएको हो । अविरल वर्षाको कारण बाढी र पहिरो गएपछि सडक र गजुरी खानेपानीलाई असर गरेको छ । खानेपानी सुचारू गर्न अध्यक्ष पण्डित आफै मर्मत कार्यमा जुट्नु भएको छ । साथै आइतबारबाट खानेपानी मर्मत सम्पन्न भइ सुचारू हुने भएको छ । वडा अध्यक्ष पण्डितले वडाबासीको समस्या नै आफ्नै समस्या भएकोले निरन्तर जनताको सेवामा समर्पित भइ समस्या समाधान गरी समृद्ध वडा निमार्ण गर्ने प्रण गर्दै वडा बासीलाई सुरक्षित र सजग रहन पनि अनुरोध गर्नुभएको छ । यस्तै बाढी प्रभावित क्षेत्रमा गाउँपालिका अध्यक्ष राजेन्द्र विक्रम बस्नेतले अनुगमन गर्दै पहिरो पन्छाएर तत्काल सडक सुचारु गर्न पहल गर्नुभएको थियो ।