सहरा बचत ऋण सहकारीको स्थापना दिवसमा भएको रक्तदान कार्यक्रममा ७२ जनाले रक्तदान गरे

धादिङ १९ श्रावण
सहारा महिला बचत तथा ऋण सहकारी संस्था लिमिटेड धादिङले आफ्नो स्थापनाको २१ औँ वर्षगाठको अवसरमा बृहत खुल्ला रक्तदान कार्यक्रमको आयोजना गरेको छ । भौतिक दुरी कायम गरी सञ्चालन गरिएको रक्तदान कार्यक्रममा ४६ पुरुष र २६ महिला गरी ७२ जनाले रक्तदान गरेको रेडक्रस धादिङका उपमन्त्री नारायण कुमार श्रेष्ठले जानकारी दिनुभयो । नेपाल रेडक्रस सोसाइटी रक्त सञ्चार सेवा केन्द्र धादिङको प्राबिधिक सहयोगमा आयोजित रक्तदान कार्यक्रममा नीलकण्ठ नगरपालिकाका उप मेयर मनराज भण्डारी र मिशन होटेल एन्ड रिसोर्ट प्रा लि को अध्यक्ष तथा स्वयंसेवी रक्तदाता सुवास बसेलले २९ औँ पटक रक्तदान गर्नुभएको थियो । धादिङ लगायत देशैभर भैरहेको रगत अभावलाई परिपूर्ति गर्न नेपाल रेडक्रस सोसाइटी जिल्ला शाखा धादिङको अगुवाइमा जिल्लाभर रक्तदान कार्यक्रम आयोजना हुदै आएका छन् ।