त्रिशुली नदीमा बालुवा झिक्ने क्रममा बेपत्ता भएका गल्छीका १६ बर्षीय किशोरका आफन्तद्धारा क्षतिपूर्तिको माग

धादिङ ३० आषाढ
त्रिशुली नदीमा बालुवा झिक्ने क्रममा असार २४ गते दिउँसो बेपत्ता भएका गल्छी गाउँपालिका वडा नम्बर २ का ताराबहादुर लुंगेली मगरको परिवारलाई क्षतिपुर्ति दिनु पर्ने माग राख्दै आफन्तजनहरुले आइतबार प्रमुख जिल्ला अधिकारी अस्मान तामाङलाई माग पत्र पेश गरेका छन् । मगर गत असार २४ गते गल्छी गाउँपालिका वडा नम्बर ४ बेल्खु स्थित डिलबहादुर भण्डारीको घर पछाडि त्रिशुली नदीमा बालुवा झिक्ने क्रममा नदीले बगाएर बेपत्ता भएका थिए । डिल बहादुर भण्डारीले आफ्नो घर पछाडि त्रिशुली नदीमा बालुवा झिक्न मगर लगायतका मजदुरहरुलाई बोलाएका थिए । बाढी आएको समयमा नदीबाट बालुवा झिकेर बेचविखन गर्दा धेरै नै नाफा हुन्छ भन्ने लोभ लालच देखाइ भण्डारीले मजदुरहरुका लागि कुनै सुरक्षाको उपाय अबलम्बन नगरी काममा लगाएका थिए । मङ्गलबार बेपत्ता मगरका आफन्तहरुले बेपत्ता भएका तारा बहादुर मगरको परिवारलाई काममा लगाउने भण्डारी, स्थानीय सरकार, ठेकेदारलाई उचित क्षतिपूर्ति उपलब्ध गराउन माग गरेका छन् । साथै जोखिमपूणर् मजदुरी गर्ने मजदुरहरुको बिमा गर्नुपर्ने र काम गर्दा आवश्यक सुरक्षाको सामग्रीहरुको व्यवस्थापन गर्न समेत माग गरेका छन् । मगरका आफन्तहरुले मङ्गलबार नै संघीय सांसद भूमि त्रिपाठी, प्रदेश सांसद राजेन्द्र पाण्डे, जिल्ला समन्वय समिति, धादिङ, जिल्ला प्रहरी कार्यालय, धादिङ र गल्छी गाउँपालिकामा समेत मागपत्र पेश गरेका छन् ।