हनुमान डाँडामा ट्रक र मोटर साइकल एक आपसमा ठक्कर खाँदा १ जना घाइते

धादिङ जेष्ठ २२
धादिङको नीलकण्ठ नगरपालिका वडा नम्बर १० हनुमान डाँडामा ट्रक र मोटर साइकल एक आपसमा ठक्कर खाँदा १ जना घाइते भएका छन् । घाईते हुनेमा त्रिपुरा सुन्दरी गाउँपालिका वडा नम्बर ५ सल्यानकोट चैनपुरका ४२ बर्षीय भिम बहादुर थापा रहेको प्रहरीले जानकारी दिएको छ । सल्यानटारबाट धादिङबेसी आउँदै गरेको ना ४ ख ८३४७ नम्बरको ट्रक र धादिङबेसीबाट सल्यानटारतर्फ जाँदै गरेको बा ३२ प ४३४३ नम्बरको मोटरसाईकल एक आपसमा ठक्कर खाँदा दुर्घटना भएको जिल्ला प्रहरी कार्यालय धादिङले जनाएको हो । घाइतेको स्थानीय युवाले आफ्नै ट्याक्सीमा राखी धादिङ अस्पतालमा ल्याएर साधारण उपचार पश्चात थप उपचारको लागि ट्रमा सेन्टर काठमाडौँ रिफर गरिएको रेडक्रसकर्मी नारायण कुमार श्रेष्ठले बताउनु भयो । ट्रक चालक र ट्रकलाई थप अनुसन्धानको लागि जिल्ला प्रहरी कार्यालय धादिङले नियन्त्रणमा लिएको प्रहरी नावय उपरिक्षक रुपक खड्काले जानकारी दिनु भयो ।