फूलखर्कमा यम बहादुर गुरुङमाथि धारिलो हतियार प्रहार, उद्धार ढिला हुँदा मृत्यु

धादिङ २७ बैशाख
धादिङको गंगाजमुना गाउँपालिका स्थित फुलखर्क देउरालीमा धारिलो हतियार प्रहारबाट एकजनाको मृत्यु भएको छ । स्थानीय भिमशेन बुढाथोकीले प्रहार गरेको धारिलो हतियारबाट गम्भीर घाइते भएका गंगाजमुना एकेडेमीका शिक्षक समेत रहेका यम बहादुर गुरुङको जिल्ला अस्पताल धादिङमा उपचारको क्रममा मृत्यु भएको हो । दुबै खुट्टा काटिएको र दुबै हात मध्ये एउटा हात छिनेको अवस्थामा ढिला गरी जिल्ला अस्पताल धादिङ ल्याइएको गुरुङलाई जिल्ला अस्पतालका डाक्टरहरुको अथक प्रयास रहदा पनि बचाउन नसकिएको जिल्ला अस्पताल स्रोतले जानकारी दिएको छ । शनिबार साँझ गम्भीर घाइते भएका गुरुङलाई नाइट भिजन हेलिकप्टरमार्फत उपचारको लागि लान खोजिए पनि हेलिकप्टर नआएपछि अन्तिम अवस्थामा गाउँपालिकामा एम्बुलेन्स उपलब्ध नभएपछि गाउँपालिकाकै गाडीमा अबेर मात्र जिल्ला अस्पतालतर्फ ल्याएको थियो । मैले गुरुङलाई हानेर आएँ भन्दै बाटोमा हिडिरहेको भिमसेन बुढाथोकीलाई स्थानीयले समाएर प्रहरीलाई बुझाएका छन् ।साँझ ५ बजे घटना भएता पनि घाइतेलाई राती सवा बाह्र बजे मात्र जिल्ला अस्पताल ल्याइएको थियो । अत्याधिक रक्तश्रावका कारण घाइते गुरुङको बाटोमा नै निधन भएको अनुमान गरिएको छ । घटना के कारणले भएको हो खुल्न सकेको छैन ।