विश्व रेडक्रस दिवसको अवसरमा धादिङमा भएको खुल्ला रक्तदानमा ५१ जनाले रगत दान गरे

धादिङ २६ बैशाख
विश्व रेडक्रस दिवस २०२० को अवसरमा धादिङमा बृहत खुल्ला रक्तदान कार्यक्रम तथा फलफूल वितरण गरिएको छ । नेपाल रेडक्रस सोसाइटी जिल्ला शाखा धादिङको आयोजनामा शुक्रबार जिल्ला अस्पताल धादिङको प्राङ्गणमा रक्तदान कार्यक्रम आयोजना गरिएको हो । विश्वभर महाँमारीको रुपमा फैलदै गएको कोरोना भाइरस रोकथाम र न्यूनीकरण गर्न सरकारले जारी गरेको लकडाउनका कारण देशैभर खुल्ला रक्तदान कार्यक्रमहरु नभएकाले रगतको अभाव भैरहेको सन्दर्भमा धादिङमा सामाजिक दुरी कायम गर्दै बृहत खुल्ला रक्तदान कार्यक्रमको आयोजना गरिएको हो । रक्तदान कार्यक्रममा १४ जना महिला र ३७ जना पुरुष गरी ५१ जनाले रक्तदान गरेका थिए । यस्तै विश्व रेडक्रस दिवसकै अवसरमा जिल्ला अस्पताल धादिङका बिरामीहरुहरुलाई फलफूल समेत वितरण गरिएको थियो । यस्तै रेडक्रसका पिता तथा जन्मदाता हेनरी ड्युनाको तस्बिरमा माल्र्यापण समेत गरिएको थियो । नेपाल रेडक्रस सोसाइटी जिल्ला शाखा धादिङका सभापति नारायण तिमल्सिनाले सहजीकरण गर्नुभएको कार्यक्रममा जिल्ला समन्वय समिति धादिङका प्रमुख जगन्नाथ नेपाल, विभिन्न सरकारी कार्यालयका प्रमुख प्रतिनिधि र रेडक्रसकर्मी तथा स्वयमसेवी रक्तदाताहरुको उपस्थिति रहेको थियो ।