स्वास्थ्य सुरक्षासहित सिरानचोकका अलपत्र नागरिक लिन काठमाडौँ गएको बस गजुरी प्रहरीले फिर्ता पठायो,गाउँपालिकाद्धारा दुःख व्यक्त

गोरखा १६ बैशाख
लकडाउनका कारण समस्यामा परेका आफ्ना नागरिक लिन सिरानचोक गाउँपालिकाले काठमाडौँ पठाएको बस गजुरी प्रहरीले राजमार्ग बाटै फिर्ता पठाएको छ । जिल्ला प्रशासन कार्यालय गोरखामा आइतबार भएको सर्वपक्षीय बैठकले काठमाडौँ लगायत देशका विभिन्न भूभागमा अलपत्र परेका नागरिकहरुलाई स्थानीय तहले व्यवस्थापन गरी सुरक्षित रुपमा गाउँ ल्याउने निर्णय गरेसँगै सिरानचोक गाउँपालिकाले मङ्गलबार ८ वटा बस काठमाडाँै पठाएको थियो । ग्रिनसिटी अस्पतालमा विशेष स्वास्थ्य परीक्षण गराएर सुरक्षित रुपमा गाउँ ल्याउने तयारीका साथ मंगलबार बिहान गोरखाबाट गएको ८ वटै बसलाई धादिङको गजुरीबाट प्रहरीले फिर्ता गरेपछि गाउँपालिकाले दुख ब्यक्त गरेको छ ।
गाउँपालिका अध्यक्ष राजु गुरुङद्धारा जारी प्रेस विज्ञप्तीमा भनिएको छ ।“लकडाउनका कारण काठमाडौँमा फसेका नागरिकहरुको आ–आफ्नो बासस्थानमा फिर्ता हुन पाउने अधिकारलाई आत्मा सम्मान गर्नुको सट्टा अदालतको समेत आदेशको संघीय सरकारले वर्खिलाप गरेको छ । यस कार्यप्रति गाउँपालिकाले खेद प्रकट गर्दछ ।” स्वास्थ्य परीक्षण गरी सुरक्षित रुपमा गाउँ ल्याउने तयारीका साथ मङ्गलबार मात्रै करिब ३ सय जनालाई स्वास्थ्य परीक्षणका लागि काठमाडौँस्थित ग्रिन सिटी अस्पतालमा जम्मा पारिएको थियो । तर बिच बाटोबाटै प्रहरीले आफ्ना नागरिक लिन काठमाडौँ जादै गरेको बस फर्काइदिएपछि नागरिकहरु अन्योलमा परेका थिए । उनीहरुलाई सिरानचोक गाउँपालिका काठमाडौँ समन्वय समितिको पहलमा आ–आफ्नो बासस्थान पु¥याउन सहयोग गरेका थिए । अध्यक्ष गुरुङले काडमाडौँमा अलपत्र आफ्ना नागरिकहरुलाई फिर्ता ल्याउनको लागि निरन्तर पहल गर्दै काठमाडौँमा समस्यामा परेका विद्यार्थी, मजदुर लगायतलाई समन्वय समितिमार्फत राहत समेत व्यवस्थापन गरिने बताउनु भयो ।
गाउँपालिका अध्यक्ष राजु गुरुङद्धारा जारी विज्ञप्ती