लकडाउनका कारण काठमाडौँमा फसेका धादिङका मजदुर विद्यार्थी घर फर्काउदैः प्रदेश सांसद सिंखडा

धादिङ ११ बैशाख
सरकारले जारी गरेको लकडाउनका कारण काठमाडौँमै अलपत्र परेका धादिङका मजदुर, विद्यार्थी तथा नागरिकहरुलाई आफ्नो घरसम्म पुर्‍याउनका लागि प्रदेश सांसद जगत सिंखडा खटिएका छन् । समस्यामा परेका जिल्लाका नागरिकहरुलाई घर पठाउनको लागि सांसद सिंखडा राती अबेरसम्म काठमाडौँ माछापोखरीस्थित बसपार्कमै खटिएका थिए । बुधबारमात्र धादिङको त्रिपुरा सुन्दरी गाउँपालिका लगायतका नागरिकहरुलाई १४ वटा गाडीमा करिब ६ सयको हाराहारीमा उद्धार गरिएको सांसद सिंखडाले बताउनु भयो । जिल्ला प्रशासन कार्यालय धादिङको समन्वयमा यातायात पास बनाइ सुरक्षित रुपमा काठमाडौँमा समस्यामा परेका धादिङका उत्तरी क्षेत्र लगायतका मजदुर र विद्यार्थीहरुलाई उद्धार गरी घर पठाइएको हो । सांसद सिंखडाले गाडीमा प्रवेश गर्ने सबै मजदुर तथा यात्रुहरुलाई निःशुल्क मास्क समेत वितरण गरेका थिए । ग्रामीण यातायात सहकारी संस्थाको १४ वटा गाडीमा समस्यामा परेका धादिङका नागरिकहरुलाई उद्धार गरिएको र अरु थप नागरिकहरुलाई उद्धारको पहल भैरहेको समेत सांसद सिंखडाले बताउनु भयो । लकडाउनका कारण काठमाडौँमा दैनिक ज्याला मजदुरी गर्ने र विद्यार्थीहरु विशेष समस्यामा परेका थिए । उनीहरु आफ्नो घर जान पाउदा अत्यन्तै खुसी भएका छन् ।