तङ्ग्रिदै धादिङ अस्पताल, एकै दिन तीन सफल अप्रेशन

धादिङ २६ चैत्र
विश्वव्यापी रुपमा फैलिदै गएको कोरोना भाइरसको सङ्क्रमणले जनजीवन कष्टपूर्ण बनिरहेको बेला जिल्ला अस्पताल धादिङले एकैदिन तीन जना गर्भवती महिलाको सल्यक्रिया गर्न सफल भएको छ । मङ्गलबार राती नीलकण्ठ नगरपालिका वडा नम्बर ८ की २२ वर्षीय मेलिना तामाङ, ज्वालामुखी गाउँपालिका वडा नम्बर ७ की २८ वर्षीय बबिता सिखंडा र नीलकण्ठ नगरपालिका वडा नम्बर ३ धादिङकी १८ वर्षीय सुसना गुरुङ रहेका छन् । उनीहरुको २÷२ घन्टाको अन्तरालमा जिल्ला अस्पताल धादिङले लगातार सफल सल्यक्रिया गरेको सूचना अधिकारी बिक्रम विकले जानकारी दिनु भयो ।

अप्रेशन पश्चात आमा र नवजात शिशुको स्वास्थ्य अवस्था राम्रो भएको जिल्ला अस्पताल धादिङले जनाएको छ । कोरोना भाईरसको कारण समस्यामा परेका बिरामीहरुलाई मध्यनजर गरेर जिल्लामै पहिलो पटक एकै दिन तीन जनाको अप्रेशन गरिएको जिल्ला अस्पताल धादिङका सुचना अधिकारी विक्रम विकले जानकारी दिनुभयो । सरकारले लकडाउनको समय थप्दै जाँदा समस्यामा परेका बिरामीहरुलाई काठमाडाँै लैजान समस्या भएपछि अस्पतालका स्टाफ नर्स लगायत कर्मचारीहरु २४ सै घण्टा खटिएर प्रसुती सेवा प्रवाह गरिरहेको विकले बताउनुभयो । अप्रेशनमा डाक्टर रन्जन राठौर, मनकुमारी श्रेष्ठ, लेख बहादुर श्रेष्ठ, रेनुका भण्डारी, बिमला तिमल्सिना महरा, श्याम गोम्जा लगायतका अन्य नर्सिङ तथा स्टाफहरुको सहभागिता रहेको थियो ।