धादिङका विभिन्न क्वारेन्टाइनमा बसेका २७ जना घर फर्किए

धादिङ २५ चैत्र
रोजगारीको शिलशिलामा भारत लगायत अन्य मुलुकबाट नेपाल फर्किएका धादिङका २७ जना घर फर्किएका छन् । डिभिजन वन कार्यालय नीलकण्ठ धादिङकोे क्वारेन्टाइनमा बसेका धादिङका १० जना र गल्छी गाउँपालिकाको क्वारेन्टाइनमा बसेका १७ जना घर फर्किएका हुन् । घर फर्किनेहरुमा नीलकण्ठ नगरपालिका वडा नम्बर ६ भोर्लेका १० जना युवाहरु रहेका छन् । उनीहरु १४ दिन सम्म नगरपालिकाले निर्माण गरेको क्वारेन्टाइनमा बस्दा कुनै स्वास्थ्य समस्या नदेखिएको र अनुशासित भएर बसेको भन्दै नगरप्रमुख भिम प्रसाद ढुङ्गानाले रातो टीका, पूmका साथै प्रमाणपत्र समेत प्रदान गरेर बिदाइ गरेका हुन् । कोरोना भाइरस (कोभिड १९) को संक्रमण हुन नदिन भारत लगायत अन्य मुलुकबाट नेपाल आई १४ दिनसम्म क्वारेन्टाइनमा बसेकाहरु घर फर्किएका हुन् । क्वारेन्टाइनमा रहेका युवाहरुलाई बिदाई गर्दै नगरप्रमुख ढुङ्गानाले अझै एक हप्ता होम क्वारेनटाईनमा बस्न आग्रह गर्नुभयो ।

बिदाई कार्यक्रममा नीलकण्ठ नगरपालिका धादिङका प्रमुख प्रशासकीय अधिकृत हरि प्रसाद अर्याल, स्वास्थ्य संयोजक विष्णु रिजाल तथा जनप्रतिनिधिहरुको सहभागिता रहेको थियो । क्वारेन्टाइनमा रहँदा समय समयमा ज्वरोको नाप लिनुको साथै प्रेसर जाँच गर्ने गरिएको थियो । नीलकण्ठ नगरपालिकाले स्थापना गरेको क्वारेन्टाइनमा बस्नेहरुका लागि खाने बस्ने व्यवस्था सबै नगरपालिकाले व्यवस्थापन गरेको हो । नगरपालिकाको क्वारेन्टाइनमा अझै नेत्रावती डबजोङ गाउँपालिकाका ५ जना युवाहरु रहेको नीलकण्ठ नगरपालिका धादिङका स्वास्थ्य संयोजक विष्णु रिजालले जानकारी दिनु भयो । यसै गरी धादिङको गल्छी गाउँपालिका वडा नम्बर ६ बैरेनी स्थित बागेश्वरी माध्यमिक विद्यालयमा निर्माण गरिएको क्वारेन्टाइनमा रहेका १७ जना पनि घर फर्किएका छन् । क्वारेन्टाइनमा रहेका १८ जना मध्ये १७ जनालाई मङ्गलबार स्वास्थ्य जाँच गरेर घर फर्काइएको गल्छी गाउँपालिकाले जनाएको छ । कोरोना भाइरस (कोभिड १९) को सम्भावित जोखिमबाट बच्न गाउँपालिकाले रोजगारीका क्रममा भारत लगायत र अन्य देशबाट नेपाल आएकाहरुलाई क्वारेन्टाइनम राखेको थियो ।