कोरोना सङ्क्रमण नियन्त्रणका लागि बेनिघाट रोराङ गापाले राजमार्ग क्षेत्रमा क्लोरिन छर्‍यो

धादिङ १९ चैत्र
धादिङको बेनिघाट रोराङ गाउँपालिकाले मलेखु पुलबाट मौवाखोला पुलसम्म कोभिड १९ तथा अन्य जीवाणुहरुको नष्ट गर्ने उद्देश्यले विषादी छरेको छ । मलेखु पुलबाट मौवाखोला पुलसम्मको मुख्य सडकका दायाँबायाँ क्लोरिन नामक विषादी छरिएको हो । विश्वभर महामारीका रुपमा फैलिएको कोरोना भाइरस(कोभीड–१९) को नियन्त्रणका लागि क्लोरिन नामक विषादी छरिएको बेनिघाट रोराङ गाउँपालिकाले जनाएको छ । सोमबार, मङ्गलबार र बुधबार तीन दिन राजमार्ग क्षेत्रमा विषादी छरिएको बेनिघाट रोराङ गाउँपालिकाका प्रमुख प्रशासकीय अधिकृत लक्ष्मण प्रसाद भट्टराइले बताउनुभयो । भट्टराइका अनुसार क्लोरिन नामक विषादीले कोरोनाका किटाणुहरु नष्ट गर्ने नभई अन्य ब्याक्टेरिया भाइरसहरुलाई समेत नियन्त्रण गर्ने भएकाले हालको सिजनमा यो उपयोगी भएको बताउनुभयो । कोरोनाको संक्रमण बढेका बेला अन्य ब्याक्टेरियाहरुले मानिसको रोग विरुद्ध लड्ने क्षमता कम गराउनसक्ने भएकोले ब्याक्टेरिया मार्न क्लोरिन नामक विषादी छर्किएको भट्टराइको भनाइ छ