लागु औषध दुव्यर्सनी तथा ओसारपसार विरुद्धको अन्तरकृया कार्यक्रम सम्पन्न

२० फाल्गुन २०७६, मङ्गलबार
समुदाय प्रहरी साझेदारी कार्यक्रम अन्तर्गत जिल्ला प्रहरी कार्यालय धादिङले लागु औषध दुव्यर्सनी तथा ओसारपसार विरुद्धको जनचेतनामूलक कार्यक्रम मङ्गलबार धादिङबेसीमा सम्पन्न भएको छ । बागमती प्रदेश प्रहरी कार्यालय हेटौँडाका निमित्त कार्यालय प्रमुख वरिष्ठ प्रहरी उपरीक्षक किशोर कुमार दाहालले लागु औषध दुव्र्यसनी तथा महिला हिंसाका घटनाहरु कस्ता ठाउँहरुमा हुन्छन् ? के कसरी हुन्छ ? जस्ता विविध विषयवस्तुहरुको बारेमा सहजीकरण गर्नु भएको थियो । यसै गरी जिल्ला प्रहरी कार्यालय धादिङका प्रहरी उपरीक्षक रविन्द्र रेग्मीले धादिङ जिल्लामा महिला हिंसा र लागु औषधका घटनाहरु दिन प्रतिदिन बढ्दै गैरहेको बताउनु भएको छ । कार्यक्रमकै अवसरमा जिल्ला प्रहरी कार्यालय धादिङले २०७४–०७५ मा ३ सय ३४ किलो चरेस , २०७५–०७६ मा १ हजार ३१ र २०७६–०७७ मा ४५ किलो चरेस बरामद गरेको रेग्मीले बताउनु भयो । रेग्मीका अनुसार लागु औषधको कारोवार विशेष गरी पृथ्वीराजमार्ग क्षेत्रमा हुने गरेकोले यसलाई नियन्त्रण गर्न नेपाल प्रहरीले निरन्तरण रुपमा खटिरहेको बताउनु भयो । विभिन्न आपराधिक क्रियाकलापमा संलग्न भएका अपराधिहरुलाई नेपाल प्रहरीले नियन्त्रण लिई कानुनीे दायरामा ल्याउने समेत रेग्मीले बताउनु भयो । कार्यक्रममा जिल्ला प्रहरी कार्यालय धादिङका प्रहरी उपरीक्षक रविन्द्र रेग्मी, प्रहरी नायव उपरीक्षक रुपक खड्का, विभिन्न संघ संस्थाका प्रमुख तथा प्रतिनिधिहरु, विभिन्न विद्यालयका विद्यार्थीहरु लगायत सञ्चारकर्मीहरुको सहभागिता रहेको थियो ।