धादिङको छुट्टा छुट्टै दुर्घटनामा एकको मृत्यु २ घाइते

धादिङ ११ फागुन
धादिङको बेनिघाट रोराङ गाउँपालिका वडा नम्बर ९ स्थित ज्यामिरेघाटमा आईतबार ट्रक त्रिशुली नदीमा खस्दा एक जनाको मृत्यु भएको छ । पृथ्वी लोकमार्ग अन्तरगत बिरगन्जबाट बनेपा जादै गरेको ना ५ ख ३७७७ नं. को शालिमार सिमेन्ट बोकेको ट्रकको टायर पड्किएर अनियन्त्रित भई सडकबाट करिव १०० मिटर तल त्रिशुली नदीमा खस्दा ट्रक चालकको मृत्यु भएको हो । मृत्यु हुनेमा ट्रक चालक मकवानपुर भिमफेदी गाउपालिका वडा नम्बर २ भैसे बस्ने ४६ बर्षीय बिखे थोकर रहेका छन् भने सह–चालक सप्तरी रुपनगरका १८ बर्षीय राजेश बि.क घाईते भएको जिल्ला प्रहरी कार्यालय धादिङका प्रहरी नायव उपरिक्षक रुपक खड्काले जानकारी दिनुभयो । घाइते ट्रक चालक थोकरको गजुरी अस्पतालमा उपचारको क्रममा मृत्यु भएको खड्काले जानकारी दिनुभयो । त्यस्तै अर्का घाईते सहचालकको अवस्था सामन्य रहेको छ ।
यस्तै धादिङको नीलकण्ठ नगरपालिका वडा नम्बर ३ स्थित जिल्ला प्रहरी कार्यालय चोकमा मोटर साइकलको ठक्करबाट एक पैदल यात्री घाईते भएका छन् । आईतबार दिउँसो १ बजे बा ९५ प ९४७४ नम्बरको मोटर साइकलले ठक्कर दिँदा नीलकण्ठ नगरपालिका वडा नम्बर ११ का ३५ बर्षीय शेर बहादुर थापा घाईते भएको जिल्ला प्रहरी कार्यालय धादिङले जानकारी दिएको हो । घाइते थापाको टाउकोमा गम्भीर चोट लागेकाले जिल्ला अस्पताल धादिङमा सामान्य उपचार पश्चात थप उपचारको लागि काठमाडौँ रिफर गरिएको छ । मोटरसाइकल चालक नेत्रावती डवजोङ गाउँपालिका वडा नम्बर ३ का २१ वर्षीय पुर्ण गुरुङलाई प्रहरीले नियन्त्रणमा लिएको छ ।