जिल्ला स्तरीय तेक्वान्दो प्रतियोगितामा सुनगाभा एकेडेमीले जित्यो ५ पदक

धादिङ १२ माघ
कपिल जम्कट्टेल
नेपाल तेक्वान्दो संघ जिल्ला कार्यसमिति धादिङद्वारा आयोजित प्रथम धादिङ जिल्ला स्तरीय ओयो तेक्वान्दो प्रतियोगितामा सुनगाभा एकेडेमी ले ३ स्वर्ण १ रजत र १ कास्य पदक सहित कुल ५ पदक जित्न सफल भएको छ । सुनगाभा एकेडेमी धादिङमा तेक्वान्दो कक्षा सञ्चालन भएको छोटो समयमा नै खेलाडी विद्यार्थीहरुले यति राम्रो प्रगति गर्दा अत्यन्तै खुसी लागेको विद्यालयका तेक्वान्दो प्रशिक्षक प्रदिप गीरीले बताउनु भयो ।

स्वास्थ्यका लागि खेलकुद, राष्ट्रका लागि खेलकुद भन्ने मुल नाराका साथ यही माघ १० देखि १२ गतेसम्म धादिङबेसीस्थित कभर्ड हलमा तेक्वान्दो प्रतियोगिता आयोजना गरिएको थियो । खेलकुद क्षेत्रको विकास तथा खेलाडीहरुप्रति सम्मान र तेक्वान्दोको प्रर्बद्धन गर्ने उद्देश्यका साथ उक्त प्रतियोगिताको आयोजना गरिएको हो । प्रतियोगितामा सुनगाभा एकेडेमी सहित जिल्लाका ७ वटा तेक्वान्दो डोजाङहरुको सहभागिता रहेको थियो ।