शङ्खादेवी मावि मझिमटार धादिङको ५४ औँ वार्षिक उत्सव भव्य रुपमा सम्पन्न

धादिङ १० माघ
शंखादेवी माध्यमिक विद्यालय बेनिघाट रोराङ गाउँपालिका वडा नं ९ मझिमटारको ५४ औं वार्षिक उत्सव तथा अभिभावक दिवस शुक्रबार सम्पन्न भएको छ । विद्यालय व्यवस्थापन समितिका अध्यक्ष सुरेश मल्लको अध्यक्षता रहेको कार्यक्रममा प्रतिनिधि सभाका सदस्य भुमी प्रसाद त्रिपाठीको प्रमुख आतिथ्यता रहेको थियो । कार्यक्रममा बेनिघाट रोराङ गाउँपालिकाका अध्यक्ष हरी डल्लाकोटी, उपाध्यक्ष देवी प्रसाद सिलवालको विशेष आतिथ्यता रहेको थियो । कार्यक्रममा नेकपा बेनिघाट रोराङ गाउँपालिकाका सचिव रमेश भट्टराई, नेपाली काङग्रेस बेनिघाटका सभापति ऋषिनाथ त्रिपाठी, राप्रपाका प्रतिनिधि, बेनिघाट रोराङ गाउँपालिकाका वडा अध्यक्षहरु, छिमेकी विद्यालयका प्रधानाध्यापकहरु, विभिन्न संघ संस्थाका प्रमुख तथा प्रतिनिधिहरु, सुरक्षाकर्मीहरु लगायत सञ्चारकर्मीहरुको सहभागिता रहेको थियो ।

कार्यक्रमका प्रमुख अतिथि समेत रहनु भएका त्रिपाठीले प्रविधिमैत्री शिक्षा र गुणस्तरीय शिक्षालाई एकै साथ लैजानु पर्ने बताउनु भएको छ । यसै गरी धादिङका सबै विद्यालयहरुमा आइसिटी कक्षा र विज्ञान प्रयोगशाला अनिवार्य रुपमा हुनु पर्नेमा जोड दिनु भयो । यस्तै भूकम्प प्रतिरोधात्मक विद्यालयको भवन बनाउनको लागि सांसद विकास कोषको रु ५० लाख रकम सहयोग गर्नु भएको थियो । कार्यक्रमका विशेष अतिथि बेनिघाट रोराङ गाउँपालिका अध्यक्ष हरी डल्लाकोटीले विद्यालयको शैक्षिक गुणस्तर अभिबृद्धि गर्नको लागि पैसाको अभाव नहुने बताउनु भयो ।

गाउँपालिकाले विद्यालयको शैक्षिक स्तर विकास गर्न शंखादेवी माध्यमिक विद्यालयको रङरोगन र मर्मतको लागि रु १८ लाख रकम र २५ थान नयाँ कम्प्युटर यस अघि नै उपलब्ध गराई सकेको छ । यस्तै गाउँपालिकाका उपाध्यक्ष देवी प्रसाद शिलवालले कक्षा ११ र १२ सञ्चालन भएका विद्यालयहरुले विद्यार्थीहरुसँग परीक्षा शुल्क, भर्ना शुल्क लिने गरेको र आगामी शैक्षिक सत्र बाट नलिन विद्यालयहरुलाई आग्रह समेत गर्नु भयो । विद्यालयको आर्थिक अभाव भएको खण्डमा कक्षा १२ सम्म आवश्यक परेकको खण्डमा गाउँपालिकाले एकमुष्ट रकम अनुदान दिने प्रतिवद्धता व्यक्त गरेको छ । विद्यालयको वार्षिक उत्सव तथा अभिभावक दिवसको अवसरमा शंखादेवी माध्यमिक विद्यालयका पुर्व ७ जना शिक्षकहरुलाई सम्मान समेत गरिएको शंखादेवी माध्यमिक विद्यालयका सहायक प्रधानाध्यापक तिलक चेपाङले जानकारी दिनु भयो ।