मदन भण्डारी स्मृति फुटबल प्रतियोगिताको उपाधाी बागेश्वरी मावि रिचोकटारलाई

धादिङ ०८ माघ
स्वास्थ्यका लागि खेलकुद, राष्ट्रका लागि खेलकुद भन्ने मूल नाराका साथ धादिङको बेनिघाट रोराङ गाउँपालिकामा भएको मदन भण्डारी स्मृति फुटबल प्रतियोगिताको उपाधी बागेश्वरी माध्यमिक विद्यालय रिचोकटारले हात पारेको छ । अन्तर माध्यमिक विद्यालय स्तरीय बृहत खेलकुद उत्सव अन्तर्गत विशालटार स्थित चन्द्रोदय माविको खेलकुद मैदानमा भएको मदन भण्डारी स्मृति फुटबल प्रतियोगितामा बागेश्वरी माध्यमिक विद्यालय रिचोकटार प्रथम, पिपल भन्ज्याङ माध्यमिक विद्यालय ताल्ती द्धितीय, चन्द्रोदय माध्यमिक विद्यालय बिशालटार तृतीय भएका हुन् । प्रतियोगितामा प्रथम हुनेलाई रु २५ हजार नगद, द्धितियलाई रु १५ हजार र तृतीयलाई १० हजार नगद सहित ट्रफी र प्रमाण पत्रद्धारा पुरस्कृत गरिएको थियो । कार्यक्रममा गाउँ पालिकाका अध्यक्ष हरि डल्लाकोटी उपाध्यक्ष देवि प्रसाद सिलवाल, शिक्षा विकास तथा समन्वय इकाई धादिङका प्रमुख अम्बिका प्रसाद आचार्य, जिल्ला खेलकुद विकास समितिका सचिव कृष्णलाल श्रेष्ठ लगायतको आतिथ्यता रहेको थियो । पुष २९ गते देखि शुरु भएको अन्तर माध्यामिक विद्यालय स्तरीय बृहत खेलकुद उत्सवको पहिलो चरणको खेलमा राष्ट्रपति रनिङ शिल्ड, हर्ष बहादुर स्मृति क्रिकेट प्रतियोगिता र मदन भण्डारी स्मृति फुटबल प्रतियोगिता लगायतका खेलहरु भएका थिए ।