दार्खा धादिङमा ढुङ्ग्रो प्रहार गरी एक जनाको हत्या

धादिङ ०८ माघ
उत्तरी धादिङको दार्खामा गएराती एक जनाको हत्या भएको छ । खनियाबास गाउँपालिका स्थित दार्खाको घ्याङ्सामा आगो फुक्ने ढुङ्ग्रोले प्रहार गर्दा एक जनाको हत्या भएको छ भने एक जना गम्भीर घाइते भएका छन् । ढुङ्ग्रो प्रहार गर्दा दार्खा घ्याङ्साका सन्ते भनिने सन्त तामाङको ज्यान गएको छ भने रविन तामाङ गम्भीर घाइते भएको प्रहरीले जानकारी दिएको छ । घाईते तामाङलाई उपचारको लागि काठमाडौ लगिएको छ । घटनामा सङ्लग्न रहेको आरोपमा नेत्रावती डबजोङ गाउँपालिका १ मार्पाकका राम तामाङ र रोशन तामाङलाई प्रहरीले पक्राउ गरी अनुसन्धान सुरु गरेको छ । दार्खामा जारी अन्तर वडा स्तरीय फुटबल प्रतियोगितामा भएको विवादले उग्र रुप लिएपछि यो घटना भएको हुन सक्ने प्रहरीले अनुमान गरेको छ । पक्राउ परेका रोशन तामाङ र राम तामाङ फुटबल प्रतियोगिताको रेफ्रि समेत रहेको र आफ्नै दाजुभाइ रहेको प्रहरीको भनाइ छ । घटनाको थप अनुसन्धान जारी रहेको जिल्ला प्रहरी कार्यालय धादिङले जानकारी दिएको छ ।