त्रिपुरा सुन्दरी गाउँ पालिका स्तरीय राष्ट्रपति रनिङ सिल्ड माघ १० बाट, अध्यक्ष कप भलिबल पनि हुदै

धादिङ २१ पौष
त्रिपुरा सुन्दरी गाउँ पालिका धादिङमा गाउँ पालिका स्तरीय अध्यक्ष कप भलिबल प्रतियोगिता हुने भएको छ । यही माघ १० गतेदेखि १२ गतेसम्म सञ्चालन हुने प्रतियोगितामा गाउँ पालिकाका ७ वटै वडाहरुबाट प्रतिनिधित्व हुने शिक्षा शाखा प्रमुख रामचन्द्र इटनीले जानकारी दिनुभयो । गाउँ पालिका स्तरीय राष्ट्रपति रनिङ सिल्ड प्रतियोगिता पनि माघ १० देखि १२ गतेसम्म सल्यानटार माध्यमिक विद्यालयमा आयोजना हुदै छ । भलिबल प्रतियोगितामा टिम दर्ताको लागि माघ ७ गतेसम्मको समय सीमा तोकिएको छ । प्रतियोगिताकै अवसरमा उद्घाटनकै दिन विभिन्न विद्यालयहरुको प्रतियोगितात्मक रुपमा सांस्कृतिक कार्यक्रम समेत गरिने शिक्षा शाखा प्रमुख एवं कार्यक्रमका संयोजक रामचन्द्र इटनीले जानकारी दिनुभयो ।

यस्तै प्रतियोगिता उद्घाटनकै दिन पालिकाभित्रका विभिन्न विद्यालयका शिक्षक तथा विद्यार्थीहरुले निर्माण गरेको शैक्षिक सामग्री हरेक विद्यालयको छुट्टा छुट्टै स्टल राखेर प्रदर्शनी गरिने समेत संयोजक इटनीले बताउनु भयो । प्रतियोगितामा गाउँ पालिकाभित्रका ११ वटा माध्यमिक विद्यालयहरुले सहभागिता जनाउने छन् । यस्तै कार्यक्रमको उद्घाटन गर्न युवा तथा खेलकुद मन्त्री जगत बहादुर विश्वकर्मालाई प्रमुख अतिथिको रुपमा ल्याउने पहल भएको समेत संयोजक इटनीले जानकारी दिनुभयो ।