ब्राइट फ्युचर इङ्लिस बोर्डिङ स्कुल सहकारीको १६ औँ वार्षिक साधारण सभा सम्पन्न

धादिङ २८ मङ्सिर
ब्राइट फ्युचर इङ्लिस बोर्डिङ स्कुल सहकारी संस्था लिमिटेड मलेखु धादिङको १६ औँ वार्षिक साधारण सभा शनिबार सम्पन्न भएको छ ।  विद्यालय व्यवस्थापन समिति अध्यक्ष राजकुमार त्रिपाठीको अध्यक्षता रहेको कार्यक्रममा वेनिघाट रोराङ गाउँ पालिकाका प्रमुख हरि डल्लाकोटीको प्रमुख आतिथ्यता रहेको थियो । यस्तै विशेष अतिथिहरुमा गाउँ पालिका उपाध्यक्ष देवि प्रसाद सिलवाल, गाउँ पालिकाका सामाजिक विकास संयोजक तथा वडा नं. ३ का अध्यक्ष भुवन त्रिपाठी रहनुभएको थियो भने अतिथिहरुमा एकीकृत अखिल नेपाल शिक्षक संगठन धादिङका वरिष्ठ उपाध्यक्ष तिलक चेपाङ, शिद्धालेक गाउँ पालिका वडा नं. ४ का वडा अध्यक्ष रामहरि बराकोटी लगायत रहनु भएको थियो ।

२०४४ सालमा स्थापना भएको सहकारीको १६ औँ साधारण सभाका अवसरमा सोही विद्यालयबाट गतवर्षको एस.इ.इ. परीक्षामा ४ जि.पि.ए. का नेपालकै उत्कृष्ठ हुन सफल निर्जला पाण्डे लगायत उत्कृष्ठ विद्यार्थीहरुलाई सम्मान समेत गरिएको थियो । कार्यक्रममा प्रधानाध्यापक कल्पना सिलवालले विद्यालयको शैक्षिक प्रगति प्रतिवेदनका साथै भावि योजना प्रस्तुत गर्नुभएको थियो । आगामी शैक्षिक सत्रबाट आफ्नै भवनमा कक्षा सञ्चालन गर्ने तयारी गरेको सो विद्यालयलाई वेनिघाट रोराङ गाउँ पालिकाले रु. १५ लाख सहयोग गरेको थियो ।