साना किसान सहकारी साना ऋणमा केन्द्रीत हुन केन्द्रीय संघका अध्यक्ष  पाठकको आग्रह

धादिङ २६ पौष
नेपाल कृषि सहकारी केन्द्रीय संघका अध्यक्ष खेम बहादुर पाठकले सरकारले कृषि क्षेत्रमा गरेको लगानी न्यून रहेकोले लगानी बढाउन सरकारसंग माग गर्नुभएको छ ।

साना किसान कृषि सहकारीहरु साना ऋणमा केन्द्रीत हुन आग्रह गर्दै किसान र कृषिमा व्यवसायिकरणका योजनाका साथ काम गर्न आग्रह गर्नुभएको छ ।

साना किसान कृषि सहकारी संघ लिमिटेड धादिङको २४ औं वार्षिक साधारण सभा तथा ९ औं अधिवेशनको उद्घाटन समारोहमा बोल्दै पाठकले निष्क्रिय रहेको नामका मात्र सहकारीहरुलाई खारेज गर्नुपर्ने र सक्रिय रुपमा रहेको सहकारीहरुलाई एकिकृत गर्नुपर्ने बताउनुभयो । उहाँले सम्पुर्ण सहकारी हरु ठुला ऋणमा नभएर साना ऋणमा केन्द्रित हुनुपर्ने बताउनुभयो ।

संघका अध्यक्ष रंगनाथ थपलियाको अध्यक्षतामा सम्पन्न भएको कार्यक्रममा थपलियाले बैंक तथा वित्तिय संस्थाको पहुँच नपुगेको विपन्न वर्ग एवं पिछडिएका वर्ग तथा दुर्गम क्षेत्रका आम समुदायलाई वित्तिय सेवाका साथै महिला सशक्तिकरण र नेत्तृत्व विकासमा उक्त सहकारीले उल्लेख्य भुमिका निभाएको बताउनुभयो । उहाँले साना किसान सहकारी संस्थाहरुले कृषि उत्पादन पशुपालन, दुध तथा मासु उत्पादनमा ऋण लगानी गर्दै आईरहेको पनि बताउनुभयो ।

सहकारीले संस्थाका सदस्यहरुलाई बचत संकलन, सहकारी शिक्षा, समुह सक्रियता, नेतृत्व विकास तालिम नीति निर्माण तालिम प्रदान गर्दै आईरहेको छ । त्यसैगरि जिल्लामा स्थापना भएका अन्य कृषि सहकारी संस्थाहरुको संस्थागत क्षमता अभिवृद्धि गर्नका लागि आवश्यक सहयोग गर्ने र सदस्यहरुद्धारा उत्पादित वस्तुहरुको भण्डारण, प्रसोधन तथा बजारीकरण गर्न सहजीकरण गर्ने समेत बताउनुभयो । संघमा ६० कृषि सहकारी आबद्ध भएका छन् ।

उद्घाटन समारोहमा बागमती प्रदेश कृषि सहकारी संघका अध्यक्ष डिल्ली प्रसाद पाठक, नेपाल पत्रकार महासंघका अध्यक्ष सीताराम अधिकारी लगायतले शुभकामना व्यक्त गर्दै साना किसानका लागि सरकारको लगानी बढाउन, कृषिमा लगानी बढाउन र बजार व्यवस्थापनमा संघले भुमिका खेल्न आग्रह गरेका छन् ।