नीलकण्ठ–८ रामकोटमा आज पञ्चमी मेला लाग्दै, सम्पुर्ण तयारी पुरा

धादिङ ४ मंसिर
धादिङको नीलकण्ठ नगरपालिका–८ रामकोटमा आज पञ्चमी मेला लाग्दै छ । हरेक वर्ष झैं यस पटक पनि मंसिर ४ गते, मंगलबार चौथीका दिन लाग्ने ठूलो जात्राको तयारी तिव्र रुपमा भइरहेको छ ।

यो मेलामा भक्तजनहरू आफ्नो मनोकामना पूरा हुने विश्वासका साथ सहभागी हुने गर्छन्। मेलाको अवसरमा फूलको डोली लगाउने, रातभर जाग्राम बस्ने र रमाइलो गर्ने परम्परा रहेको छ ।

मेलामा मण्डलीदेवी र मण्डलेश्वर महादेवको पूजा गरी आशीर्वाद माग्ने चलन छ । स्थानीयका अनुसार, रामकोटमा दुई मण्डलीदेवी (जेठी र माइली) रहेको र कान्छी बहिनी भने “यहाँ बस्दिन“ भन्दै ढोला मण्डलीमा पुगेको किम्वदन्ती रहेको छ।

आज रातभर जाग्राम बस्ने र रमाइलो गरि भोली चौथीको दिन पूजापाठ र पञ्चमीमा बलि चढाउने प्रचलन छ, जसले भक्तजनहरूको मनोकामना पूरा हुने विश्वास छ। देवीको पूजा मगर समुदायले गर्ने चलन छ भने मण्डलेश्वर महादेवको पूजा ब्राह्मणहरूले गर्ने परम्परा रहेको छ।

विशेष रूपमा, देवीको पूजा १२ वर्षभन्दा कम उमेरका अविवाहित मगर बालकले गर्ने प्रचलन छ। मेलालाई आकर्षक बनाउन लोप हुँदै गएको रोटे पिङ समेत राखिएको छ । डाँडामा रहेको मन्दिरबाट सुन्दर दृश्यावलोकन गर्न सकिने र पूजापाठ गरी आशिष प्राप्त हुने विश्वासले भक्तजनहरूको भिड लाग्ने गर्छ।

रामकोट दरबारको नाममा आफ्नो छुट्टै ऐतिहासिक महत्त्व राखेको स्थानमा भग्नावशेषहरू आज पनि भेटिन्छन्।

ऐतिहासिक र पर्यटकीय महत्त्व बोकेको यस स्थानको संरक्षण र व्यवस्थापनका लागि नीलकण्ठ नगरपालिका वडा नम्बर ८ का वडा अध्यक्ष प्रकाश कुमार श्रेष्ठले वडा कार्यालयबाट पहल भइरहेको बताउनुभयो ।