पालिका स्तरीय हाजिरी जवाफ प्रतियोगितामा शङ्खादेवी मा.वि मझिमटार प्रथम

धादिङ १३ मङ्सिर
वेनिघाट रोराङ गाउँ पालिका स्तरीय अन्तर विद्यालय हाजिरी जवाफ प्रतियोगितामा शङ्खादेवी माध्यमिक विद्यालय मझिमटार प्रथम भएको छ । गाउँ पालिकाका सामुदायिक र संस्थागत गरी १९ वटा विद्यालयको सहभागिता रहेको आधारभूत तहको उक्त प्रतियोगितामा शङ्खादेवी माध्यमिक विद्यालयले १२ अङ्कका साथ प्रथम स्थान हासिल गरेको हो । प्रतियोगितामा ११ अङ्कका साथ कालिका आधारभूत विद्यालय मोहरिया द्धितीय, ९ अङ्कका साथ वागेश्वरी माध्यमिक विद्यालय रिचोकटार तृतीय र कालिका माध्यमिक विद्यालय विदाङ सान्त्वना भएका छन् । प्रतियोगितामा विजयी विद्यार्थीहरुलाई वेनिघाट रोराङ गाउँ पालिकाका प्रमुख प्रशासकीय अधिकृत लक्ष्मण भट्टराईले पुरस्कृत गर्नुभएको थियो । यस अघि भएको शिक्षकहरुको हाजिरी जवाफ प्रतियोगितामा समेत शङ्खादेवी माध्यमिक विद्यालय मझिमटार प्रथम भएको विद्यालयका सहायक प्रधानाध्यापक तिलक चेपाङले जानकारी दिनुभयो । यस्तै आगामी २० गते चन्द्रोदय माध्यमिक विद्यालय विशालटारमा माध्यमिक तहको हाजिरी जवाफ प्रतियोगिता सञ्चालन हुने समेत जानकारी दिनुभयो ।