नारायणगढ–मुग्लिन सडकखण्ड अन्तर्गत २५ ठाउँमा पहिरोको जोखिम

धादिङ ३१ जेठ
नारायणगढ–मुग्लिन सडकखण्ड अन्तरर्गत २५ ठाउँमा पहिरोको जोखिम रहेको डिभिजन सडक कार्यालयले जनाएको छ ।

कार्यालयका प्रमुख रमेशप्रसाद पौडेलकाअनुसार तीमध्ये चार ठाउँ उच्च र सात ठाउँ कम जोखिममा छन् ।

मौरी पुल, नाम्सी पुल, कालीखोला र तुइन पुल क्षेत्रमा पहिरोको उच्च जोखिम छ । सडकको नाम्सी, कालीखोला र तुइन खोलाको पहिरो नियन्त्रणका लागि ५२ करोड रुपैयाँ खर्च हुने अनुमानित लागत छ । ती ठाउँमा ‘स्लोप स्टेवलाइजेसन’ र ‘रक नेटिङ’ को काम गर्नुपर्नेछ ।

यसैगरी पहिरोको कम जोखिम भएका गाईघाट, डुम्रे पुल, घुमाउने, सिमलताल, जलवीरे र पाँच किलोमा पनि सडक व्यवस्थापन गर्नुपर्नेछ । २०८० सालको बर्खामा उक्त सडकमा ३० र २०७९ सालमा ३६ पटक भू–क्षय हुँदा पटक–पटक गाडी आउजाउ अवरुद्ध भएको थियो ।

डिभिजन सडक कार्यालयका इन्जिनियर सागर कार्कीले पानी परेपछि जुनसुकै बेला भू–क्षयको जोखिम रहेकाले सेती दोभान, मौरी पुल र चार किलोमा उपकरण तम्तयार गरिने बताउनुभयो । हेटौँडामा रहेको हेवी इक्युप्मेन्ट डिभिजन र डुम्रेको यान्त्रिक कार्यालयबाट पनि उपकरणको प्रबन्ध गरिनेछ ।

उक्त सडक खण्डको केराबारीमा नेचरबेस सोलुसन नामको संस्थाले बायो इन्जिनियरिङ प्रविधिबाट पहिरो नियन्त्रण अध्ययन गरिरहेको छ । सडकका खहरे खोला, भतेरीको ओरालो, गाईघाट, सेतीदोभान, जलवीरे, २६ किलो र चार किलो क्षेत्रका ११ ठाउँमा अध्ययन गर्न संस्थाले सडक विभागलाई पत्राचार गरेको छ ।

अनलाईन साभार