तिलगंगा सर्जिकल आँखा केन्द्रद्धारा सञ्चालित आँखा शिविरमा १२३ जनाको निशुल्क आँखाको अप्रेशन

धादिङ ९ जेठ

धादिङबेशीमा तिलगंगा सर्जिकल आँखा केन्द्र द्धारा सञ्चालित आँखा शिविरमा १२३ जनाको निशुल्क आँखाको अप्रेशन गरिएको छ ।

तिलगंगा सर्जिकल आँखा केन्द्र धादिङले सोमबार र मंगलबार दुई जिल्लाको विभिन्न स्थानमा सञ्चालन गरेको निशुल्क आँखा शिविरमा मोतिविन्दु भेटिएका १२३ जना बिरामीहरुको निशुल्क शल्यक्रिया गरिएको हो ।

सोमबार ५७ जना र मंगलबार ६६ जना गरी १२३ जनाको धादिङबेशीमा शल्यक्रिया गरिएको तिलगंगा शल्यक्रिया आँखा केन्द्र धादिङका प्रमुख सुपेन्द्र ताम्राकारले जानकारी दिनुभयो । शिविरमा बिरामीको शल्यक्रिया खर्च, शल्यक्रियाको समयमा खान,बस्न र टाढाबाट आवत जावतको लागी बसको समेत ब्यवस्था गरिएको थियो ।

गाउँ टोलमै गएर निशूल्क शिविर संचालन गर्दा रोग पहिचान भएको र धादिङबेशी आएर निशुल्क अप्रेशन गर्न पाउँदा खुसी लागेको नागरिकहरुको भनाइ छ ।

तिलगंगा शल्यक्रिया आँखा केन्द्र धादिङको आयोजना र धुनिबेशी नगरपालिका, सिद्धलेक गाउँपालिका, नीलकण्ठ नगरपालिका र गल्छी गाउँपालिकाको सह आयोजनामा बैशाख २७ गतेदेखि जेठ ५ गतेसम्म विभिन्न स्वास्थ्य चौकीहरुमा मातिविन्दु छनौट एक दिने निशुल्क शिविर संचालन भएको थियो ।