‘विकासको मोडेललाई उत्पादनसंग जोड्ने खालको योजना ल्याउन आवश्यक छ’–पुर्व अर्थमन्त्री पाण्डे

धादिङ १४ बैशाख
नेकपा एमालेका उपाध्यक्ष तथा पूर्व अर्थमन्त्री सुरेन्द्र पाण्डेले विकासको मोडेललाई उत्पादन र एकीकृत समूदायसंग जोड्ने खालको योजना ल्याउन अर्थमन्त्रीलाई आग्रह गर्नुभएको छ ।

प्रेस चौतारी धादिङले शुक्रबार धादिङबेसीमा आयोजना गरेको पत्रकार भेटघाट कार्यक्रममा पूर्व अर्थमन्त्री रहनुभएका पाण्डेले विकासको मोडेल फरक कोणबाट अघि बढाउनु पर्ने बताउँदै सबै काम एकैपटक गर्न खोज्दा अनुत्पादक लगानी बढेको लामो समयसम्म प्रतिफल लिन नसक्ने अवस्थामा पुगेको बताउनुभयो ।

बजेट छरेर दिँदा उपलब्ध नहुने भएकोले रणनीतिक योजनाहरुमा लगानी गर्नु पर्ने बताउनुभएको छ । योजनाको प्राथमिकिकरण गर्दै साना र बजेट छर्ने योजना लगानी गरेपनि ७० प्रतिशत लगानी रणनीतिक योजनाहरुमा लगानी गर्नुपर्ने पूर्व अर्थमन्त्री पाण्डेको भनाइ छ ।

निर्माण व्यवसाय, सेयर बजार, घरजग्गा कारोबार लगायतका स्थानमा आर्थिक कारोबार घट्दा अर्थतन्त्र संकुचित भएकोले धेरैलाई रोजगारी दिन सक्ने, विकासको मोडेललाई उत्पादनसंग जोड्ने खालको योजना ल्याउन पत्रकार सम्मेलन मार्फत अर्थमन्त्रीलाई आग्रह गर्नुभयो ।

आन्तरिक ऋण, बैदेसिक ऋण, नेपाली र बैदेसिक लगानी ल्याएर अर्थतन्त्रमा लगानी गर्न सक्दामात्र हाल मन्द भएको अर्थतन्त्रले गति लिने भएकोले अर्थमन्त्रीले ल्याउने बजेट प्रमोटिभ एप्रोचको हुनु पर्ने र रोजगारी सिर्जना गर्नुपर्ने उहाँको भनाइ छ ।

उक्त पत्रकार भेटघाट कार्यक्रममा नेकपा एमाले केन्द्रीय सदस्य तथा धादिङ इन्चार्ज धर्मदत्त देवकोटा, खेम लोहनी, नेकपा एमाले जिल्ला अध्यक्ष भूमि त्रिपाठी लगायतका नेताहरुको सहभागिता रहेको थियो ।