कटुञ्जे धादिङमा रेडक्रसको १५ औँ शिक्षक नायक तथा २३ औँ जुनियर युवा गोष्ठी सुरु

धादिङ कार्तिक २८
नेपाल रेडक्रस सोसाइटी जिल्ला शाखा धादिङको आयोजनामा १५ औँ शिक्षक नायक गोष्ठी तथा २३ औँ जुनियर युवा गोष्ठी कुण्डला माध्यमिक विद्यालय नेत्रावती डबजोङ गाउँपालिका वडा नं ४ कटुञ्जेमा बिहिबार देखि सुरु भएको छ । जुनियर युवा संयोजक नेम बहादुर श्रेष्ठको अध्यक्षता रहेको कार्यक्रममा प्रदेश सांसद डा. राम कुमार अधिकारीको प्रमुख आतिथ्यता रहेको थियो । गोष्ठीमा ५३ विद्यालयका युवा सदस्य तथा शिक्षक नायकहरु गरी कुल १ सय ५४ जनाको सहभागिता रहेको थियो ।

कार्यक्रमलाई सम्बोधन गर्दै सांसद अधिकारीले रेडक्रस धादिङले भूकम्प, बाढी, पहिरो, विपन्न समुदायको हितको लागि महत्त्वपूर्ण काम गर्दै आएकाले आगामी दिनमा पनि निरन्तरता र सफलताको शुभकामना दिनुभयो । गोष्ठी कात्तिक २९ गते सम्म सञ्चालन हुने रेडक्रसकर्मी नारायण कुमार श्रेष्ठले जानकारी दिनु भयो ।