नीलकण्ठ नगरपालिका स्तरीय राष्ट्रपति रनिङ शिल्ड सम्पन्न, २१ स्वर्ण सहित उपाधी नीलकण्ठ माविलाई

धादिङ ९ पौष

धादिङको नीलकण्ठ नगरपालिका स्तरीय राष्ट्रपति रनिङ शिल्ड प्रतियोगिता आईतबार सम्पन्न भएको छ ।

पुष ६ गतेबाट सन्चालन भएको प्रतियोगितामा सबैभन्दा बढी स्वर्ण जितेर नीलकण्ठ माविले दोस्रो पटक पनि उपाधी जितेको छ । नीलकण्ठ माध्यमिक विद्यालयले २१ स्वर्ण पदक सहित उपाधी हात पारेको हो ।

यसैगरी धादिङबेसीमै रहेको बालमन्दीर माध्यमिक विद्यालयले ८ स्वर्ण पदक जित्दै दोस्रो हुन सफल भएको छ । प्रतियोगितामा नीजि तर्फको एड्भान्स एकेडेमीले ५ स्वर्ण जित्दै तेस्रो हुन सफल भएको छ । तीन वटा विद्यालयले समान ४ स्वर्ण जित्दै चौथो हुन सफल भएका छन् । सांकोष मावि,पशुपति मावि र शंखादेवी मावि चौथो स्थान हासिल गर्न सफल भएका छन् । प्रतियोगितामा ३१ वटा विद्यालयका १३ सय विद्यार्थीहरुको सहभागिता रहेको थियो ।

नीलकण्ठ नगरपालिकाका मेयर तथा नगरपालिका संघका केन्द्रिय अध्यक्ष भीम प्रसाद ढुंगानाको अध्यक्षतामा सम्पन्न भएको पुरस्कार वितरण कार्यक्रम नेपाली काँग्रेसका बागमती प्रदेश सभापति ईन्द्र बानियाको प्रमुख आतिथ्यता रहेको थियो ।

कार्यक्रममा नगर उप प्रमुख दिपक विश्वकर्मा,सिद्धलेक गाउँपालिका अध्यक्ष परशुराम खतिवडा,खनियावास गाउँपालिका अध्यक्ष रणबहादुर तामाङ,प्रमुख जिल्ला अधिकारी बद्रीनाथ गैह्रे,प्रहरी प्रमुख गौतम मिश्र, नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुवेदी,वडा अध्यक्षहरु,कार्यपालिका सदस्य लगायत सरोकारवाला निकायका प्रमुखहरुको आतिथ्यता रहेको थियो ।

बिजयी विद्यालयहरुलाई नगद सहित ट्रफि,मेडल र प्रमाणपत्रबाट पुरस्कृत गरीएको थियो । कार्यक्रमलाई सम्बोधन गर्नुहुदै प्रमुख अतिथी बानियाले खेलकुद क्षेत्रलाई अगाडी बढाउनको लागि प्रत्येक विद्यालयमा एक जना खेल शिक्षक आवश्यक रहेको बताउनुभयो । खेलले देशको प्रतिनिधित्व गर्ने भन्दै उहाँले खेलाडीहरुलाई बिचलित नभईकन खेल क्षेत्रमै लाग्नको लागि आग्रह गर्नुभयो ।