गंगाजमुनामा खेतीयोग्य जमिनको माटो जाँच तथा कृषि पशु बिमा सम्बन्धी अभिमुखीकरण सम्पन्न

धादिङ २८ मंसिर
धादिङको गंगाजमुना गाउँपालिकामा खेतीयोग्य जमिनको माटो जाँच र कृषि तथा पशु बिमा सम्बन्धी १ दिने अभिमुखीकरण कार्यक्रम सम्पन्न भएको छ ।

विहीबार गंगाजमुना गाउँपालिकाको कृषि तथा पशु विकास शाखाको आयोजनामा पहिलो पटक गाउँपालिकाको कृषकहरूलाई माटो जाँच र कृषि तथा पशु बिमा सम्बन्धी अभिमुखीकरण कार्यक्रम वडा नम्बर १ र २ मा सम्पन्न गरिएको हो ।

कार्यक्रममा माटो जाँच गर्नुको फाइदा , माटो जाँचको लागि नमुना संकलन विधि सिकाएको छ भने उक्त कार्यक्रमले माटोको अम्लियपना, क्षारियपना , बालीवस्तुलाई आवश्यक पर्ने खाद्य तत्वको मात्रा पत्ता लगाई माटो प्रदूषण हुनबाट बच्न सहयोग गर्ने तथा माटोको गुणस्तर कायम राख्न मद्दत गरी आवश्यकतानुसार मलखादको सही व्यवस्थापनमा सहयोग पुर्याई कृषि उत्पादन र उत्पादकत्व बढाउने विश्वास लिएको प्रमुख प्रशासकीय अधिकृत अनिल श्रेष्ठले रेडियो बिहानीलाई जानकारी गराउनुभयो ।

यस्ता खालका अभिमुखीकरण कार्यक्रम गाउँपालिकाको सबै वडाहरुमा सञ्चालन गरिने बताउदै प्रमुख प्रशासकीय अधिकृत श्रेष्ठले कृषि तथा पशुपंक्षी व्यवसायमा संलग्न कृषकहरूलाई बीमा सम्बन्धी जानकारी तथा प्रोत्साहन स्वरुप कार्यक्रम आयोजना गरेको बताउनुभयो । विभिन्न वडामा नमुना सङ्कलन गरी माटो परीक्षणको क्रममा रहेको समेत बताउनुभयो । उहाँले आफ्नो व्यवसाय सुरक्षि होस् या भविश्यमा आउनसक्ने जोखिम न्युनिकरण गर्न पशु बीमा गर्न आवश्यक रहेको र तालिममा सिकेको ज्ञान र अनुभव लिने मात्र नभएर व्यवहारमा लागु गर्दा व्यवसायले थप सफलता पाउने विश्वास व्यक्त गर्नुभयो ।

त्यस्तै गाउँपालिका अध्यक्ष भक्त बहादुर लामाले पशुहरुमा लाग्ने किटजन्य रोग, आँधीहुरी, बाढि, पहिरो, महामारी जस्ता विपद्ले व्यवसायमा क्षतिहुने जोखिमका सम्भावनाहरु बारे जानकारी प्रदान गर्न बजेट विनियोजन गरी कार्यक्रम आयोजना गरेको बताउनुभयो ।

कार्यक्रममा पशुपंक्षी बीमाबाट पशुपालन क्षेत्रलाई विस्तार एवम् प्रवर्धन गर्ने, पशुपंक्षी व्यवसायीहरुको हुन सक्ने सम्भावित जोखिमको न्यूनिकरण गरी व्यवसायिक पशुपालन तर्फ आकर्षित गर्न सहयोग गर्ने, पशुपालन क्षेत्रमा नीजि तथा सहकारी क्षेत्रको लगानी आकर्षित गर्ने, पशुपालन क्षेत्रमा लगानीलाई प्रोत्साहन गर्ने, पशु उत्पादनलाई वृद्दि गरी आयातलाई प्रतिस्थापन गर्ने बीमाका प्रमुख उदेश्यहरु बारे छलफल भएको पशु विकास शाखा प्रमुख निरञ्जना चौधरीले जानकारी दिनुभयो ।

कार्यक्रममा उपस्थित शिखर ईन्सुरेन्स धादिङको प्रतिनिधि राजकुमार आले मगर र राजकुमार शाक्यबाट “जोखीम, बीमा तथा बीमाको सैद्धान्तिक पक्ष” बिषयमा जानकारी मुलक प्रस्तुतिकरण दिएका थिए । उनीहरूले व्यवसाय र पशुपंक्षीमा हुने जोखीम, खतरा तथा जोखीम व्यवस्थापन गर्ने विधि तथा क्षतिपूर्तिको अवस्था लगायत बीमा दावि गर्ने प्रकृयाहरु बारे जानकारी मुलक प्रस्तुतिकरण दिएको हो ।

स्थानीय कृषक तथा पशुपंक्षी व्यवसायीको अनुसार गाउँपालिकाले पहिलो पटक यस किसिमको कार्यक्रमको आयोजना गर्दा कृषि तथा पशु व्यवसाय कार्यमा अगाडी बढ्न उत्प्ररित गरेको स्थानीयको भनाई छ ।