लैङिगक हिंसाको अन्त्य गर्नु नै सभ्य समाज बिकासको आधार तय गर्नु हो–उपाध्यक्ष बिसुराल

धादिङ १९ मंसिर
धादिङको गजुरी गाउँपालिकाका उपाध्यक्ष सर्मिला विसुरालले लैङिगक हिंसाको अन्त्य गर्नु नै सभ्य समाज बिकासको आधार तय गर्नु रहेको बताउनुभएको छ ।

सोमबार रेडियो बिहानीसंग कुरा गर्दै उहाँले यस्तो बताउनुभएको हो । हाम्रो समाजमा भए गरेका यौन हिंसा,घरेलु हिंसा,लैङिगक हिंसा जस्ता सामाजिक अपराधजन्य क्रियाकलापहरुलाई अन्त्य गर्न समाजमा बृहत्तर रुपमा सचेतना फैलाउन आवश्यक रहेको उपाध्यक्ष बिसुराललले बताउनुभयो ।

संबृद्ध गजुरी गाउँपालिका निर्माण गर्न गाउँपालिकाले शैक्षिक,आर्थिक तथा भौतिक बिकास,कृषि तथा पर्यटन,गरिबी न्युनीकरण,सिप बिकास जस्ता कार्यक्रमहरुलाई ससक्त रुपमा काम गरिरहेको बताउनुभयो ।

नागरिक सचेतनामुलक कार्यक्रमहरु प्रत्येक वडाहरुमा एउटा अभियान नै बनाएर सञ्चालन गरिरहेको बताउदै लैङिगक हिंसा विरुद्धको १६ दिने विश्वव्यापी अभियानलाई बर्षभरिनै सञ्चालन गर्नुपर्ने स्पष्ट पार्नुभयो ।

सचेत नागरिक,आमा समूह,मानवअधिकारवादी शक्ति,स्थानीय तहका राष्ट्रसेवक कर्मचारी,जनप्रतिनिधी,प्रहरी युनिट एक भएर गाउँपालिकामा सचेतना अभियान सञ्चालन गरिरहेको उपाध्यक्ष बिसुरालले जानकारी दिनुभयो ।