धादिङमा रक्तदान कार्यक्रम सम्पन्न ६२ जनाले गराए रक्तदान

धादिङ ९ मंसिर

धादिङको नेत्रावति बचत तथा ऋण सहकारी संस्था लिमिटेडको १६ औँ बार्षिक उत्सव तथा छैटौँ अधिवेशनको अवसरमा रक्तदान कार्यक्रम सम्पन्न भएको छ ।

शनिबार त्रिपुरासुन्दरी गाउँपालिका वडा नम्बर ७ खहरे स्थित अचने मा.वि मा रक्तदान कार्यक्रम सम्पन्न भएको हो । उक्त रक्तदान कार्यक्रममा २९ जना महिला ३३ जना पुरुष गरि जम्मा ६२ जनाले रक्तदान गरेको नेपाल रेडक्रस सोसाईटी जिल्ला शाखा धादिङका कोषाध्यक्ष नारायण कुमार श्रेष्ठले जानकारी दिनुभयो ।

नेत्रावति बचत तथा ऋण सहकारी संस्था लिमिटेडको आयोजना र नेपाल रेडक्रस सोसाईटी रक्त संचार सेवा केन्द्र प्राविधिक सहयोगमा रक्तदान कार्यक्रम सम्पन्न भएको हो ।

जिल्लामा अभियानकै रुपमा रक्तदान कार्यक्रम आयोजना गर्दै आएको छ । रगतको अभावलाई न्युनीकरण गर्नको लागी विभिन्न मेला, पर्व, उत्सव, सहकारीको बार्षिक साधारण सभा लगायतको भेला हुने कार्यक्रममा रक्तदान कार्यक्रम राखि रगत संकलन गर्दै आएको छ ।