धादिङमा भव्य रुपमा मनाए चेपाङ समूदायले न्वागी(छोनाम) पर्व

धादिङ २२ भाद्र
चेपाङ सङ्घले हरेक वर्ष चितवन,धादिङ मकवानपुर लाई केन्द्र मानेर न्वागी (छोनाम)मनाउँदै आएका छन् ।यस बर्ष धादिङको गजुरी गाउँपालिका वडा नम्बर ५ च्याङलीमा विशेष सांस्कृतिक कार्यक्रमको उदघाटन गरि मनाएको हो ।

चेपाङ संघ केन्द्रिय अध्यक्ष गोविन्द चेपाङको अध्यक्षता बागमती प्रदेश सरकारको मुख्यमन्त्री शालिकराम जम्बटेलको प्रमुख आतिथ्यतामा सम्पन्न भएको हो । जस्को बिशिष्ठ अतिथिको रुपमा संघीय सांसद रामनाथ अधिकारी,बागमती प्रदेश सरकारका पुर्व राज्यमन्त्री सन्त बहादुर चेपाङ लगायतको उपस्थिती रहेको थियो ।

कार्यक्रमलाई सम्बोधन गर्दै मुख्यमन्त्री जम्कटेलले धादिङ मकवानपुर र चितवनका चेपाङ समूदायका बिकासका निम्ति संरक्षित क्षेत्र घोषणा गर्नुपर्ने कुराहरु बाहिर आएको हुनाले राजनैतिक स्वार्थ भन्दा पनि संस्थागत रुपमा कार्यदलनै बनाएर बिकास र संबृद्धिमा जोड्नुपर्ने तर्क व्यक्त गर्नुभयो । सबै जनसमूदाय एक भएर चेपाङ समूदायलाई सामाजिक न्यायसंगत ढङ्गले बिकास गर्नुपर्ने संघीय सांसद रामनाथ अधिकारीले बताउनुभयो ।

बागमती प्रदेश सरकारले न्वागी(छोनम)मनाउन धादिङ, चितवन र मकवानपुरमा शुक्रबार सार्वजनिक बिदा दिएको थियो । गण्डकी प्रदेशको गोरखाका विभिन्न स्थानीय तहहरुलेपनि सार्वजानिक विदा दिएर भव्य रुपमा न्वागी मनाएको छ ।

सरकारले सूचीकृत गरेको ५९ आदिवासी जनजातिमध्ये चेपाङ पनि एक हो । महाभारत पर्वत शृङ्खला वरिपरिको रैथाने बासिन्दा मानिन्छन् । मकवानपुर पश्चिम, चितवन उत्तर र धादिङका दक्षिणी भेगमा चेपाङको घना बसोबास छ । चेपाङ समुदायको जनसंख्या सबैभन्दा धेरै चितवन,मकवानपुर र धादिङमा छ । नेपालको करिव २६ जिल्ला ओगटेको यस समूदाय देशभर ८४ हजार ३ सय ६४ जनसंख्या रहेका छन् ।

चेपाङ समुदायले आफ्नो प्रमुख चाडका रूपमा हरेक वर्ष भदौ २२ गते न्वागी(छोनाम)पर्व मनाउँछन् । भदौमा नयाँ अन्नबाली, फलफूल पाकेपछि पूजा गर्ने परम्परा रहेको छ,यसका लागि चेपाङ झाँक्री (पान्दे)हरूले एकपाखे ढ्याङ्ग्रो ठोक्दै कुखुराको बलि चढाउने प्रचलन पनि रहिआएको छ । विहीबार राती देखि जागराम बसि आज शुक्रबार उत्सवको रुपमा मनाउने गरिएको चेपाङ संघ केन्द्रिय अध्यक्ष गोविन्द चेपाङ बताउछन् ।

नेपालका सीमान्तकृत चेपाङ समुदायले मनाउने न्वागी पर्व निकै रमाइलो र चाखलाग्दो रहेकोछ । चेपाङ समुदायले मनाउने यो ‘न्वागी’(छोनाम) उनीहरुको मुख्य पर्व पनि हो । चेपाङ भाषामा ‘न्वागी’ भनेको ‘छोनाम’ हो । पितृ बुझाउने र भूमि पूजा गर्ने पर्वका रूपमा परिचित यो पर्वमा आफ्ना कूलभरिमा मानिस मूल झाँक्रीको घरमा जम्मा भएर झाँक्री फलाक्ने गर्दछन् ।

यो पर्वमा विशेषगरी घैया धान, गाभा, निबुवा, घिरौलालगायत कन्दमूल र तरकारी पितृलाई बुझाएर अन्न फलाउने भूमिलाई पूजा गर्ने प्रचलन रहिआएको छ ।

चेपाङ जातिलाई भौगोलिक संरक्षित भौगोलिक क्षेत्रभन्दा सामाजिक तथा सांस्कृतिक सिमानाले बाँधेको हुनाले जन्मदेखि मृत्युसम्मको संस्कार पनि भूमिसँग सम्बन्धित छ ।