आज निजामती सेवा दिवस विभिन्न कार्यक्रम गरी मनाइँदै

धादिङ २२ भाद्र

आज निजामती कर्मचारी दिवस विभिन्न कार्यक्रम गरी मनाइँदैछ । सरकारले विसं २०६२ देखि हरेक वर्षको भदौ २२ मा निजामती कर्मचारी दिवस मनाउँदै आएको छ ।

विसं २०१३ भदौ २२ गते तत्कालीन प्रधानमन्त्री टंकप्रसाद आचार्यको सरकारले निजामती ऐन ल्याएको अवसरमा यो दिवस मनाउन लागिएको हो । दिवसका अवसरमा उत्कृष्ट निजामती कर्मचारीलाई पुरस्कृत, सम्मान र सेवानिवृत्तलाई सम्मान गर्दै आइएको छ।

यो वर्ष पनि सरकारले निजामती सेवाका ४० जना कर्मचारीलाई पुरस्कृत गर्ने निर्णय गरेको छ। साथै सरकारले संघीय निजामती सेवाको गठन, सञ्चालन र सेवाको शर्तसम्बन्धी विधेयक, २०८० सङ्घीय संसद्मा पेस गर्ने निर्णय पनि गरेको छ।

निजामती कर्मचारी दिवस अवसरमा कर्मचारी मिलन केन्द्र धादिङद्धारा आयोजना गरिएको रक्तदान कार्यक्रम

यसैबीच मुख्यसचिव डा वैकुण्ठ अर्यालले निजामती सेवालाई प्रविधिमैत्री बनाउँदै लैजानु पर्ने आवश्यकता रहेको बताएका छन् । सार्वजनिक सेवा प्रवाहलाई चुस्तदुरुस्त एवं प्रभावकारी बनाउन प्रविधिको प्रयोगमा जोड दिनुपर्ने उहाको भनाइ छ ।

निजामती कर्मचारी दिवस अवसरमा कर्मचारी मिलन केन्द्र धादिङद्धारा आयोजना गरिएको मैत्रीपुर्ण फुटबल प्रतियोगिता

उहाले निजामती सेवालाई कार्य सम्पादनमुखी कर्मचारीतन्त्रका रूपमा परिवर्तन गर्न आफू लागि पर्ने बताउनुभयो । प्रशासन क्षेत्रलाई अब्बल, सक्षम र सबल बनाउन आफू प्रयासरत रहेको उहाको भनाइ रहेको छ ।

यसै दिवसको अवसरमा कर्मचारी मिलन केन्द्र धादिङले रक्तदान, मैत्रीपुर्ण फुटबल प्रतियोगिता, ब्याडमिन्टन प्रतियोगिता, खुल्ला कविता वाचन प्रतियोगिता लगायतका कार्यक्रमहरु सम्पन्न गरिसकेको छ ।

निजामती कर्मचारी दिवस अवसरमा कर्मचारी मिलन केन्द्र धादिङद्धारा आयोजना गरिएको खुल्ला कविता वाचन प्रतियोगिता

यसको पुरस्कार तथा सम्मान भने भाद्र २२ गते अर्थात (आज) शुक्रबार निजामती कर्मचारी दिवसको दिन जिल्ला समन्वय समिती सभाहलमा भव्य कार्यक्रम गरी हस्तनतरण गर्ने कर्मचारी मिलन केन्द्र धादिङले जनाएको छ ।